Монголчууд бид олны анхаарлыг татсан үйл явдал, дуулиан гарахад 7 хоног сошиалд шуугиад өнгөрөх бус бодитой үр дүн авчиртал тууштай тэмцэх хэрэгтэй юм. Ингэж хэлэхийн учир нь өнгөрсөн оны долоодугаар сарын 23-ны өдөр АТГ-ынхан МИАТ-ийн дэд захирал Х.Энхбаатарыг авлигын хэргээр саатуулж байсан билээ. 

Тухайн үед түүнийг бусдаас 600 сая төгрөг авсан хэмээн сенсаацилж байсан ч энэ тухай мэдээлэл аажим аажимаар олны анхаарлын төвөөс гарсан.

Учир нь уг мэдээллийг намжаахын тулд МАН-ынхан элдэв янзын улстөрийн акц зохион байгуулж олны анхаарлыг өөр тийш нь аваачсан. Тэгвэл одоо Н.Энхбаатар нарын хүмүүс үнэхээр бусдаас 600 сая төгрөгийн авлига авсан уу, үгүй юу, энэ асуудал ямар шатандаа явж байгаа вэ хэмээн АТГ болон прокурорын байгууллагаас асуумаар байна.

Тус дуулиан гарах үед Н.Энхбаатараас гадна Ерөнхий сайд У.Хүрэлсүхийн ойрын хүн болох МИАТ-ийн Санхүү эрхэлсэн захирал Энхбаатарын Мөнхмарал, мөн МАН-ын Ерөнхий нарийн бичгийн дарга Л.Амарбаясгалангийн гарын хүн болох тус компанийн Хуулийн хэлтсийн дарга Нэмэхжаргалын Гантулга нарыг дээрх хэрэгт холбогдсон гэх мэдээлэл гарч байв.

Хэрвээ дээрх хүмүүс уг хэрэгт холбогдолгүй бол яагаад өнөөг хүртэл энэ талаарх мэдээллийг хуулийнхан олон нийтэд өгөхгүй байна вэ. Учир нь тухайн үед ард түмэн АТГ-ыг МАН-ын туслахуудын холбогдсон 60 тэрбумын авлигын хэргийг илчилж эхэллээ хэмээн сайшаалтай хандаж байсан ч МАН-ынхан уг хэргийг ард түмний ой санамжаас арчиж өөр нэгэн сенсаац руу ард түмнийг хөтөлсөн. Уг нь прокурорын газраас Н.Энхбаатарыг саатуулах 30 хоногийн хуулийн хугацаа дууссан өдөр үргэлжлүүлэн хорих саналаа шүүхэд хүргүүлж, шүүхээс яллагдагчаар татаж, дахин нэг сар үргэлжлүүлэн хорих шийдвэрийг гаргасан ч өмгөөлөгчийнх нь хүсэлтээр сэжигтэн Н.Энхбаатарыг батлан даалтад гаргаж байсан юм.

Ямартай ч бид дараагийн дугаартаа мартагдсан 600 саяын авлигын Н.Энхбаатар нарын хэрэг яагаад сураг алдарсан тухайг мэдээллэх болно. 

Р.Саруул 

http://erennews.mn/index.php?view=article&type=item&val=18761