УИХ-ын гишүүн, Эдийн засгийн хөгжлийн сайд Н.Батбаяр Азийн Хөгжлийн Банкны Монгол дахь суурин төлөөлөгч ноён Роберт Шоэллхаммер нар энэ сарын 14-нд "Төлбөрийн системийн шинэчлэл" төслийн зээлийн гэрээнд гарын үсэг зурав.

Энэхүү ёслолын ажиллагаанд Монголбанкны Дэд ерөнхийлөгч Э.Батшугар болон албаны бусад хүмүүс оролцжээ.

Хоёр жилийн хугацаатай хэрэгжих уг төсөл нь Монгол Улсад бэлэн бус төлбөр тооцоог хөгжүүлэх, одоогийн дэд бүтцийг өргөтгөн бодит цагийн горимд мөнгөн урсгалыг хянах замаар мөнгөний бодлогын хэрэгжилт, хяналтыг сайжруулах зорилготой аж.

Төслийн зээлийн гэрээний хүрээнд Азийн Хөгжлийн Банкнаас 20 сая ам.доллар, Монгол Улсын Засгийн газраас 2,5 сая ам.долларын хөрөнгө оруулалтыг тус тус хийхээр төлөвлөсөн байна. Төслийн зээлийн гэрээний хүрээнд АХБ-аас хийгдэх санхүүжилт нь энгийн эх үүсвэрээс санхүүжих арилжааны зээлийн хөрөнгөөс бүрдэх бөгөөд уг зээл нь 15 жилийн хугацаатай, үүнээс 5 жилд нь үндсэн төлбөрөөс чөлөөлөгдөж зээлийн хүү нь Лондонгийн биржийн банк хоорондын зах зээлийн жилийн хүүн дээр 0.4 хувийн шимтгэл, хөрөнгийн нөөцийг баталгаажуулсан хураамж болох 0.15 хувийг нэмсэнтэй тэнцүү байх юм.

Төслийг хэрэгжүүлснээр банкуудын бүтээлч байдлыг дээшлүүлж, мөнгө угаах болон бусад гэмт хэрэгтэй тэмцэхэд дэмжлэг болох олон улсын санхүүгийн зах зээлд нэгдэн орох боломжуудыг өргөтгөх зэрэг эдийн засаг, нийгэмд шууд ба шууд бус үр ашгийг бий болгох юм байна.

Х.Даваа