Бүр зориг ороод явчих чинь. Яагаад гээч. Ямар нэг өр төлбөр, тооцоонд унана тэр даруйд нь төр асуудалгүйгээр бүгдийг нь төлчихдөг болчихжээ. Энэ бол 21 дүгээр зууны  ардчилсан, шинэ Монгол Улсын иргэдээ өмөөрөх, хайрлах, хамгаалахын хам­гийн том илэрхийлэл аж.

Хамгийн ойрын жишээ хэлэхэд өнөөх олон жил араасаа баахан хэл ам дугуулсан “Анод” банкны удирдлагуудаас болж хохир­сон 1200 харилцагчийн нөхөн төлбөрийг төр даана гээд амлаж орхижээ цаана чинь.  Уг нь хууль, шүүхийнхэн Тус банкны “ТУЗ-ийн дарга Э.Гүр-Аранз, Гүйцэтгэх захирал Д.Энхтөр, ТУЗ-ийн гишүүн Н.Даваа, Тамгын газрын дарга Л.Уламбаяр, зээлийн газрын захирал Э.Оюунсүрэн нар банкны хууль тогтоомж зөрчиж, хууль бус үйл ажиллагаа явуулан, бусдын эд хөрөнгө завшиж үрэгдүүлснээр иргэд, байгууллагад 122 тэр­бум төгрөг, дөрвөн сая ам.долла­рын хохирол учруулсан” гэх дүгнэлтийг гаргасан байдаг. Гэхдээ одоо хэдэн тэрбум төгрөгөөр тоологдох том ялаас тэд ангижирч байна.

Үгүй яахав. Энэ  дар­га нарт “Та нарыг ял эдлүүлэхгүй. Харин ажиллаж байж  122 тэрбум төгрөгийг хохирсон харилцагчиддаа олж өг” гэсэн бол эд хаанаас ийм их мөнгийг олох вэ. Оллоо гэж бодоход мөн л ууль бус зүйл хийнэ шүү дээ. Ер нь Монголын төр ч сайхан юмаа. Ийм нигүүлсэнгүй сэтгэлийг нь гадныхан хараад яаж атаархаж байгаа бол. Ёстой “Яах гэж энэ муу хөгшин Европт төрөв өө. Монголд л төрчихгүй” гэж толгойгоо нүдэх гадаад эр ч байж магад. Аргагүй л юмтай улс гэж энэ шүү дээ.

Үнэндээ ганц “Анод” ч биш ар араасаа шил даран дампуурсан Хадгаламж зээлийн хоршоодын хохирогчдод ч гэсэн төр, засаг минь буянаа харамгүй хайрлахаар болов. Гэхдээ хариуцлага алдаж өрөнд орсон болгонд төр мөнгө өгөөд байтал нэг талд татвар төлөгчид нь “боож үхэх” гэж байгаа ч төрийн том ивээлийг хүн болгонд зориг оруулсан сайн алхам гэдгийг ч учир мэдэх нь хэлдэг гэнэ билээ.

 

Л.Баатархүү