2014 оны 3-р сарын 24-ны өдөр  иргэн Д нь эхнэрээ хичээлдээ явсан хойно нь  хардаж төрсөн хоёр үрээ хазаж тамалсан хэрэг гарсан билээ. Хэргийг  Сүхбаатар дүүргийн цагдаагийн газар шалгасан бөгөөд хэргийн мөрдөн байцаалт дуусжээ.  Ингээд хуулийн дагуу прокурор, шүүхийн шатанд шилжсэн байна.  Ирэх даваа гарагт буюу 2014 оны 8 дугаар сар 11-ны өдөр  төрсөн үрээ хазаж тамалсан Д-г шүүх хурал болох юм байна.  Түүнд  Эрүүгийн хуулийн  100.1 буюу байнгын тарчлан зовоох гэсэн заалтаар яллаж байгаа бөгөөд энэхүү заалт нь  2 жилийн ялаар шийтгэх хуулийн заалттай юм байна.  

Хүүхдүүдээ хазаж тамалсан  Д-г саатуулах хуулийн хугацаа  дууссан болохоор өнөөдөр эрх чөлөөтэй явж байгаа юм. Тэрбээр эхнэртэйгээ 13 жил амьдарч байгаа бөгөөд архины хамааралтай, гэрийнхнээ байнга хардаж, зоддог байсан байна. Үүний улмаас  том хүү Д.Т  /12 настай/, дунд хүү  Д.Т / найман настай/, бага охин  Д.Д   /хоёр настай/ хүн үнсье гэхэд  айдаг,  шөнө унтахдаа  цочиж сэрдэг бөгөөд  сэтгэл санааны  асар их дарамтад орсон байна.  

Хазуулсан хүүхдүүдийн хувьд өнгөрсөн хугацаанд  удаа дараа эмнэлэгт хэвтэн эмчлүүлсэн юм. Хэдийгээр биеийн шарх нь сорви болон эдгэсэн ч хүүхдүүдийн сэтгэлийн шарх нь эдгээгүй байгаа юм.

Олон жилийн турш  гэр бүлийн хүчирхийлэлийн золиос болсон хүүхдүүд, эмэгтэйчүүдэд бие болон сэтгэл санааны хохиролыг нөхөн төлөх хуулийн заалт  манай улсад байдаггүй. Тиймээс  гэр бүлийнхнээ 13 жилийн турш  тамалсан эцгийг хуулийн дагуу 2 жил яллахаас өөрөөр хуулийнхан юу ч хийх боломжгүй гэдгийг тайлбарласан юм.

 

А.Баярмаа