​Нэг сар 16 хоногтой хүүхэд өрхийн эмчийн бичиж өгсөн эмнээс хордож эндсэн байж болзошгүй хэрэг өнгөрсөн сард гарсан. 

Бид уг хэргийн талаар нэхэн сурвалжиллаа. Өнгөрсөн зургаадугаар сарын 19-ны өдөр Сүхбаатар дүүргийн 18 дугаар хорооны иргэн н.Энхтүвшингийн нэг сартай нярай ханиад хүрч аав, ээж нь өрхийн эмнэлэгтээ ханджээ. 

Тус хорооны “Гэрэлт манал” өрхийн эмнэлгийн их эмч Ч.Долгорсүрэн ханиад хүрсэн охиныг үзээд аньсны ханд, салбутамоль, кали иод зэрэг эмийг бичиж өгсөн байна. 

Тэр өдөр охины ар гэрийнхэн Налайх дүүргийн нутагт байрлах зуслангийн байшиндаа очсон бөгөөд охиндоо эмчийн бичиж өгсөн эмийг уулгасан аж. Гэтэл охин нь оройдоо ухаангүй болсон байна. Аав, ээж нь Налайх дүүргийн эмнэлгийн эмч нарт хандсан боловч охин нь аль хэдийнэ амьсгал хураасан байсан гэнэ. 

Харин Ч.Долгорсүрэн их эмчийн охинд бичиж өгсөн эмийг хоёр сар хүрээгүй нярайд бүү хэл хоёр нас хүрээгүй хүүхдэд уулгаж болдоггүй гэдийг Налайх дүүргийн эмч нар хэлжээ. 

Эмчийн бичиж өгсөн эмийг ууснаас хойш нярайн биеэс их хэмжээний цэр гарч байсан бөгөөд нас барсан хойно нь ч гарсаар байжээ. 

Уг хэргийг одоогийн байдлаар Налайх дүүргийн цагдаагийн хэлтэст шалгаж байгаа бөгөөд шүүх эмнэлгийнхэн нярайн эндсэн шалтгааныг тогтоохоор ажиллаж байна. 

“Гэрэлт манал” өрхийн эмнэлгийн их эмч Ч.Долгорсүрэн “Нярайн эмээ нь эмийн  талаар мэдлэгтэй хүн байдаг юм. Миний бичиж өгсөн зарим эмийг ачдаа өгөөгүй байсан. Мөн аав, ээж нь охиноо ханиад хүрчихсэн байхад зуслан руугаа аваад явчихсан байсан. Миний бичиж өгсөн эм хүчтэй өндөр тунтай биш. Би энэ эмийг бага насны хүүхдэд нэг их бичиж өгдөггүй. Тухайн үед охин цэртэй ханиалгаж байсан учраас энэ эмийг бичиж өгсөн юм“ гэсэн тайлбарыг өгсөн байна. 

Бид Ч.Долгорсүрэн эмчтэй уулзахаар “Гэрэлт манал” өрхийн эмнэлгийг зорилоо. Гэвч их эмч Ч.Долгорсүрэн ажилдаа очоогүй байсан бөгөөд тус эмнэлгийн нийгмийн ажилтан “Ч.Долгорсүрэн их эмч ажлаасаа гарч байгаа. Шүүх эмнэлгийн дүгнэлт гараагүй байгаа учраас ямар нэгэн тайлбар өгөх боломжгүй байна” гэв.

Тус эмнэлгийн орлогч, их эмч н.Алтайгаас зарим зүйлийг тодрууллаа.

-Нэг сартай нярайд хоёр нас хүрээгүй хүүхэд уух хориотой эм бичиж өгсөн нь охины аминд хүрсэн гэж аав, ээж нь үзэж байна. Яагаад ийм эм бичиж өгсөн юм бол?
-Би тухайн үед эзгүй байсан. Нярайн эндсэн шалтгааныг удахгүй тодруулна. Тэр болтол ямар нэг тайлбар өгмөөргүй байна.

-Хэрвээ эмчийг буруутай гэж үзвэл ямар хариуцлага тооцох вэ?
-Би мэдэхгүй. Эмч буруутай ч байж болно, үгүй ч байж болно. Үүнийг би тогтоохгүй.

-Ч.Долгорсүрэн эмч ажилдаа ирэхгүй байгаа гэж байна. Түүнийг халсан юм биш үү?
-Бид энэ хэргийн талаар мэдээлэл өгч болно. Гэхдээ шүүх эмнэлгийн дүгнэлт гарахаас өмнө ямар ч асуултад хариулмааргүй байна хэмээсэн.

“Гэрэлт манал” өрхийн эмнэлгийн эмч, ажилчид энэ мэтчилэн бидний асуултад хариулахаас татгалзаж байв. 

Тус эмнэлгийн их эмч Ч.Долгорсүрэнтэй утсаар холбогдох гэсэн боловч мөн л тайлбар өгөхөөс татгалзав. Нярайд бичиж өгсөн Сальбутомал буюу салброн нь бронхитын болон умайн хүзүүний агшилтыг сулруулах, титэм судсыг өргөсгөх зэрэг үйлчилгээтэй бөгөөд энэ эмийг бронхитын багтраа, архаг бронхитын хөдлөлт, умайн булчингийн чангарлын үед хэрэглэдэг аж. 

Уг эмийг уусан хүнд толгой эргэж гар салгалах, зүрх дэлсэх, бөөлжих зэрэг гаж нөлөө илэрч болох бөгөөд хоёр хүртэлх насны хүүхэд хэрэглэхийг хориглодог байна. 

Хоёр нас хүрээгүй хүүхдэд ямар учраас энэ эмийг бичиж өгсөн талаараа Ч.Долгорсүрэн их эмч тодорхой хариулт өгөөгүй. Энэ эмийг нярайд уулгаж болдоггүй нь үнэн бол Ч.Долгорсүрэн эмч буруутан болох нь. Гэхдээ бүхнийг эмч болон эм зүйчид тохоод өнгөрч болохгүй. Зарим эм зүйч Салброн эмийг нярайд маш бага тунгаар өгч болно гэж байна. Тиймээс Ч.Долгорсүрэн эмч энэ эмийг ямар тунгаар бичиж өгсөн болон Э.Цэнд охины аав, ээж энэ эмийг охиндоо эмчийн заавраар өгсөн эсэх, ямар тунгаар өгсөн гэдэг нь тодорхойгүй учраас хэрэг явдалд хэт эрт дүгнэлт өгөх нь өрөөсгөл ойлголт юм. 

Нярайн бие маш эмзэг учраас эмийн тунг багахан хэмжээгээр зөрүүлэх эсвэл цагийг нь зөрүүлэхэд эрсдэл учрах магадлалтай байдаг гэнэ. Мөн ханиадтай нярай хатгаа тусах магадлал өндөр байдаг учраас шүүх эмнэлгийн дүгнэлтийг л хүлээх үлдэж байна. 

Ямартай ч хоёр сар ч хүрээгүй нярай бусдын буруугаас ийнхүү эндлээ.

Н.Санжаасүрэн