Уран бүтээлчдийг бид тоглосон кино, дүрээр нь нэрлэх нь олонтоо. Тухайлбал, “Гарын таван хуруу” киноны Шагдар, “Өнөр бүл”-ийн гажиг Гармаа, Хасар Жагаа гээд л хүн бүрийн мэддэг дүрээр нь нэрлэсэн байдаг.

Энэ удаад “Би чамд хайртай” киноны Үрлээгийн дүрээр үзэгчдийн сэтгэлд үлдсэн жүжигчин С.Пүрэвмаагийн талаар дараах мэдээллийг хүргэж байна.

Тэрбээр жүжигчин болох мөрөөдөлтэй байсан ч дунд сургуулиа төгсөөд эмнэлэгт асрагчаар ажиллах болжээ. Гэсэн хэдий ч  жүжигчин болох хүсэл мөрөөдлөө гээлгүй, сэтгэлдээ тээсээр явж. Ингээд 1984 онд хүүхэлдэйн театрт жүжигчнээр орж 1996 он хүртэл ажилласан байна. Жүжигчин С.Пүрэвмаа “Би чамд хайртай” киноны Үрлээгийн дүрд тоглосноос хойш маш олон захидал авсан гэдэг. Тухайн үед кино урлагт нэгэн шинэ хуудас нээсэн кино хэмээн “Би чамд хайртай”-г дүгнэдэг. Жүжигчин С.Пүрэвмаа Үрлээгийн дүрээс гадна “Амьдралын урсгал”, “Манай цүндгэр” кинонд гол дүрд тоглож байсан.

Өдгөө тэрбээр таван хүүхдийн ээж болсон бөгөөд дизайнерын ажил хийж байна. Сонирхуулахад, жүжигчин бүсгүй маань цагаан хоолтон бөгөөд бясалгалаар хичээллээд багагүй хугацаа өнгөрчээ.   

Б.Хорлоо