МУГЖ С.Жавхлангийн хань уртын дуучин Г.Эрдэнэчимэгийг та бүхэн андахгүй мэднэ. Сүүлийн жилүүдэд тэрбээр өөрийн урласан дээл, хувцсаар гангарах болж, бүсгүйчүүд ч түүний загварыг хуулбарласан дээлээр гоёхыг илүүд үзэх болсон билээ.

"Өдөр тутамдаа хөнгөн, богиновтор дээл өмсдөг. Ер нь эмэгтэй хүн бүсэлхийгээрээ дулаахан явах ёстой юм билээ. Бүх өвчний эх үүсвэр гэдэс, нуруугаараа даарснаас болдог гэж дуулсан юм байна. Үстэй дээлээ өмсөөд салхи авахгүй, өвдөхгүй, даарахгүй өвөлжих боломжтой. Одоо бол дэлгүүр хоршоо, энд тэнд дээлтэйгээ явахад хүмүүс хэдийнээ дассан байна лээ. Зарим нь хүлээн зөвшөөрөхгүй, дэндүү туйлширч байна гэж боддог байх л даа. Хүн болгон өөрийн бодолтой, сайхны үнэлэмж нь хүртэл өөр байдаг. Тэгэхээр тэр хүмүүсийг үгүйсгэх аргагүй. Би заавал таалагдах гээд байх ч албагүй. Үстэй дээл хувцас нүсэр санагдаж байвал тэр хүн нимгэн, хөнгөн хувцсаа өмсөөд л яваг. Ер нь хүмүүс монгол хувцсаа өмсөх хандлага илүү болсон. Загварын хувьд ч гэсэн өдөр тутамд өмсөхөд хялбар пельникээс ялгаагүй байхаар урлаж байна. Би үндэсний онцлог гэж байх ёстой гэж боддог. Монгол хүн өөрийн гэсэн өв соёл, түүхээ мэддэг, ганц нэг дээл хувцастай байж, үр хүүхдүүд нь дээлнийхээ ач холбогдол, яаж хийдэг гээд тэр болгоныг мэдэж өсөх хэрэгтэй. Би ярихаараа нэг л мэдэхэд хүүхдийн хүмүүжлийн талаар яриа уруу орчихоод байдаг юм. “Үлгэрлэхгүй бол үглээд хэрэггүй” гэдэг үгийг санаж хүүхдүүддээ үлгэрлэхийг хичээдэг" хэмээн нэгэнтээ ярьсан удаатай.

Тэгвэл уран бүсгүй саяхан болж өнгөрсөн ханийхаа тоглолт дээр ийн гоёсон нь олны нүдийг хужирлаж байлаа. Түүний тэргүүлж яваа Монголоороо төвийн хамт олон малчдад тусламж илгээхэд зориулж нэмнээ хандивласан юм.

О.Ариун