ХУД-ийн 15-р хороонд оршин суугч иргэн бидэнд гомдол гаргасан юм. Тодруулбал, тэрбээр тус хороонд баригдсан “Хурд” ХХК-ний “Рапид харш”-д орон сууц болон автомашины гражж худалдан авсан байна.  

Ингэхдээ гражжны мөнгө болох 12000 ам.долларыг “Хурд” ХХК-ний дансанд шилжүүлэн худалдан авчээ. Гражж худалдаж авсан тухайн үед буюу /2012.03.05/ өдөр том жийп машин хангалттай орох стандартын дагуу баригдаж байгаа хэмээн холбогдох албаны хүмүүс хэлсэн байна. Ингээд гражж тухайн оны дөрөвдүгээр сард ашиглалтанд ороход машин тавих хангалттай зай талбай байхгүй баригдсан байжээ.

Тэрбээр тус компаний удирдлагууд, холбогдох хүмүүст энэ асуудлаар өргөдөл гаргахад шийдэж өгнө хэмээн хэлсэн боловч өнөөдрийг хүртэл шийдээгүйгээр барахгүй дахин дахин хэл ам гаргах юм, машинаа жижигрүүл эсвэл эндээс нүү гэсэн хариулт өгөөд байгаа аж. Ингээд тэд сар гаруйн өмнө уг асуудлын дагуу өргөдөл бичиж ШӨХТГ-т өгсөн байна.

Мөн гомдол гаргагч иргэн гражжид тавих боломжгүй тул машинаа гадаа тавьж, удаа дараа машинд шүргүүлж, эдийн засгийн хувьд хохироод байгаа хэмээн хэлж байна. Одоогоор тус газар байрлах гражжны үнэ гучин сая гараад байгааг гомдол гаргасан иргэн онцолж байна.

Тэрбээр өргөдөл өгөөд шийдэгдэхгүй байгаа энэ асуудалд гомдолтой байгаа бөгөөд гражжийг солиулах эсвэл түүнтэй дүйцэхүйц мөнгөн дүнг гаргуулж авах хүсэлтэй байгаа аж.

Б.Хорлоо