АН, МАН хоёр гэж муудсан ч сайдаж байдаг, сайдсан ч эргээд муудаж байдаг яршиг төвөгтэй хоёр нам Монголын улстөрд бий. Хэдхэн өдрийн өмнө санаа нийлээд хамтдаа батлан үйлдсэн Сонгуулийн хуулиасаа болоод бас муудацгаагаад л байна. Юу гэхээр пропорциональ 28-ын мандатыг тойргуудад хэрхэн хуваарилах вэ гэдэг дээр өөрсдийн байр сууриа эхэнд тусгуулчих гээд АН, МАН-ын бүлэг өөр өөрсдийнхөөрөө дайраад байгаа юм. Ямартай ч тэд УИХ-ын сонгуулийг нэг мандаттай 76 тойрогт зохион байгуулахаар болсон бөгөөд 48 тойргийн мандат дээр жагсаалтын 28 мандатыг аймаг, нийслэлд оноож, тойргийг 76 болгох шаардлагатай болсон юм. Гэтэл тэгээд нөгөөх 28-аасаа болоод өөр өөр үгсийг хэлцгээж байгаа юм.

УИХ дахь МАН-ын бүлгийн зүгээс анх илэрхийлж байсан байр суурь бол жагсаалтын 28 мандатын 20-ыг нь хөдөөд, 8-ыг нь нийслэлд хуваарилах ёстой гэж байсан. Харин одоо бол Ардчилсан намаас хөдөөд 14, хотод 14 гэсэн хатуу шаардлагыг тавьж байгаа учраас буулт хийж болох юм гээд байгаа. Ингэхдээ хөдөөгийн нэг мандаттай бүх аймгууд хоёр мандаттай болох ёстой гэсэн шаардлага тавьж байгаа бөгөөд энэхүү хувилбараар 18-16 мандат хөдөөд, 10-12 мандат хотод хуваарилах ёстой гээд байгаа юм. Үүнийгээ тэд өмнөхөөсөө буулт хийсэн хувилбар гэж буй.

За тэгвэл Ардчилсан намын бүлгийн тухайд 14, 14 гэдэг нь пропорциональ элементийг хадгалах гэсэн санаа гэж буй. Өмнөх сонгуулиар УИХ-д сонгогдсон 28 гишүүн нийт ард иргэдээс сонгогдож гарч ирсэн учраас тэнцвэртэйгээр хуваарилах нь зөв гэж Ардчилсан нам үзсэн. Энэ хувилбар нь хүн ам, газар нутаг, засаг захиргааны нэгжтэйгээ мөн уялдсан хэмээн бүлгийн дарга Гарамгайбаатар ярьж суугаа юм.

Б.Тамир

Эх сурвалж: Шуурхай.мн