Казахстан улсын Алматы хотноо болсон сонирхогчдын боксын дэлхийн аварга шалгаруулах тэмцээнд 118 орны 600 гаруй боксчин хүч үзжээ. Энэ үзүүлэлтээрээ боксын түүхэн дэх хамгийн том, өргөн цар хүрээтэй тэмцээн боллоо гэж үзэж байна. 

Манай улсаас долоон тамирчин оролцсоноос гавьяат тамирчин У.Мөнх-Эрдэнэ хүрэл медаль хүртэж дэлхийн аваргын хос хүрэл медалийг энгэртээ зүүсэн билээ. Гавьяат тамирчин У.Мөнх-Эрдэнэ сэтгүүлчдийн сонирхсон асуултанд өгсөн ярилцлагаас хүргэж байна.

-Мөнгөн медалийн төлөөх Кубын боксчинтой хийсэн тоглолтынхоо талаар яриач? 
-ДАШТ бол миний хувьд энэ жил орж байгаа Азийн аваргын дараах хоёр дахь чанартай тэмцээн. Биеийн ерөнхий хүчний бэлтгэл сайн байсан ч олон улсын өндөр чансаатай тэмцээнд ороход хангалтгүй байлаа. Хэрэв олон улсын бэлтгэл тэмцээнд хамрагдсан бол үүнээс илүү амжилт гаргах байсан байх. Миний өрсөлдөгч Кубын тамирчин их чадварлаг тамирчин. Би ийм зиндааны тамирчидтай бэлтгэл хийгээд тэмцээнд оролцсон бол байдал илүү сайнаар эргэх байсан болов уу. 

-Дэлхийн аваргын шалгаруулах тэмцээн зохион байгуулалтын хувьд ямар байсан бэ? 
-Манай баг тамирчидаас Казахстаны боксчидтой таарсан хүн байгаагүй. Казахын ард түмэн биднийг халуун дотноор хүлээж авч, дэмжиж байсан. Бид нутагтаа байгаа юм шиг санагдсан шүү. 

-Таныг энэ тэмцээний дараа зодог тайлж магадгүй гэсэн яриа гарсан байна? 
-Үгүй, миний зорилго бол 2015 оны Азийн аварга, 2016 оны олимпод амжилт гаргах. Саяын тэмцээнд надтай чацуу, надаас хоёроор ах боксчин түрүүллээ. Миний хувьд боломж байгаа, бэлтгэл сайтай гэдгээ энэ тэмцээний үеэр батлан харуулсан гэж бодож байна.
 
-Монголын ард түмэндээ хандаж юу гэж хэлэх вэ? 
-Өмнөө тавьсан зорилгоо 100 хувь биелүүлж чадаагүй ч 118 орон оролцсон, боксын түүхэн дэх хамгийн том тэмцээнээс медальтай ирлээ. Улсынхаа нэр хүндийг унагаахгүй ирсэндээ баяртай байна. Тэмцээний үеэр дэмжиж байсан та бүхэндээ баярлалаа.