Өмнө нь бид тус банкныхан ажилчиддаа орон сууц өгөх нэрийдлээр 80 гаруй хүнийг хохироож байсан тухай мэдээлж байсан. Тэгвэл тус банкны удирдлагууд энэ удаад хүний эрхийг маш ноцтойгоор зөрчжээ.
 
Тухайлбал «Капитал» банкинд ажиллаж байсан Ц гэгч эмэгтэй жирэмсэн болсныхоо төлөө ажлаасаа халагдаад зогсохгүй амьдарч байсан орон байрнаасаа хөөгдөж гудамжинд гарчээ.
 
Хүний эрхэнд бүдүүлгээр ингэж халдах нь манай орны ардчилсан үзэл баримтлалд хэр нийцэх бол гэдэг асуултыг иргэн Ц гэгч тавьснаар асуудал ил болов. Учир юу вэ гэвэл энэ банкны удирдлагууд эмэгтэй теллерүүдтэйгээ хачин сонин гэмээр хамтарч ажиллах гэрээ байгуулдаг байжээ.
 
Тодруулбал Ц-г жирэмсэн болоод ажлаасаа халагдсаных нь дараа түүний ойр тойрны хүмүүс ихэд гайхаж энэ жигтэй явдлыг холбогдох газрын хүмүүст нь дуулгах санал тавьж байжээ.
 
Хүний эрхийн үндэсний комиссоос ажлын албаны шалгалт хийснээр тэдний хууль бус үйлдэл илэрч ажилчдынхаа эрх ашгийг ноцтойгоор зөрчиж байсан нь нотлогдсон тул банкны удирдлагуудад зөрчлөө арилгах шаардлага хүргүүлжээ.
 
Учир нь тус банкны ажилчдын тавьсан хүсэлтийн дагуу ХЭҮК-оос ажлын хэсэг гарч банкинд шалгалт хийхэд Хөдөлмөрийн хууль, Хүний эрх зэргийн 13 зөрчил илрүүлсэн байна.
 
Ингээд ХЭҮК-оос банкны удирдлагуудад зөрчил дутагдлаа арилгах эсвэл өөрчлөх шаардлагыг хүргүүлэхэд тус банкны хуулийн зөвлөх нь «Ирүүлсэн шаардлага үндэслэлгүй учир биелүүлэх боломжгүй» гэж мэдэгдсэн аж.
 
Уг нь холбогдох байгууллагаас нь тэднийг ноцтой зөрчил илрүүлсэн хэмээн мэдэгдсэн байхад яагаад тэдний тавьсан шаардлагыг хүлээж авахгүй байна гэдэг нь хачирхалтай.
 
Товчхондоо тус банкинд тогтвортой ажиллахын тулд эмэгтэйчүүд нөхөрт гарахгүй хүүхэдтэй болохгүй гэсэн хатуу гэрээ хийж байж банкны удирдлагуудад таалагдах боломжтой болно гэсэн үг.
 
Түүнчлэн банкны удирдлагууд эмэгтэй ажилчидтай гэрээ хийхдээ гурван жилийн хугацаанд жирэмслэхгүй гэсэн хатуу гэрээ хийдэг юм байна. Хэрвээ тухайн эмэгтэй заасан хугацаанд гэрээгээ зөрчсөн тохиолдолд өөрийн хүсэлтээр албан ёсоор ажлаасаа чөлөөлөгдөх ёстой аж.
 
Энэ хатуу гэрээг яг таг хийсэн ч гэрээгээ зөрчсөн тохиолдолд авсан цалингийнхаа 50 хувийг тус газарт төлж байж өр ширгүй болдог байна. Дээрх хатуу болзолууд үнэхээр хүний эрхийг ноцтой зөрчиж байгаагийн нэгээхэн том илрэл. Энэ мэт асуудлыг «Бишрэлт»-ийн босс Б.Ундармаа мэдэхгүй баймааргүй юм.
 
Хэдийгээр өнөөдөр хувийн хэвшил ч үнэнчээр ажиллаж байсан ажилтнаа жирэмсэн гэх шалтгаар ажлаас нь халж гудамжинд хөөж гаргачихаад авсан цалингийнх нь 50 хувийг авч байгааг эмэгтэй хүнд баймааргүй араншин гэхээс өөр юу гэж тайлбарлах билээ.
 
«Капитал» банк тавьсан шаардлагыг хүлээж аваагүй
 
Бид тус газартай холбоотой асуудлаар ХЭҮК-ийн ажлын албанаас тодруулахад. Яг одоогоор ажлын алба гадуур форумд оролцож байгаа. Ямар ч байсан «Капитал» банктай холбоотой гомдлыг тус банкны ажилтан гаргасан. Тухайлбал өргөдөлдөө «Капитал» банк нь хүний эрхийг зөрчиж байна.
 
Үүнийг шалгаж өгөөч ээ» гэсэн байсан. Эл гомдлын дагуу комиссын гишүүн бүрэн эрхийнхээ хүрээнд ажлын хэсэг байгуулан тус банкинд шалгалт хийсэн. Гэтэл нэлээд хэдэн зөрчил илэрсэн. Эцэст нь хэлэхэд тус банкны удирдлагууд хүний эрхийг ноцтой зөрчсөн нь баримтаар илэрсэн шүү дээ. Тодорхой мэдээллийг ажлын албанаас авбал арай дэлгэрэнгүй болох байх» гэв.
 
Тус банкинд хүний эрхийн олон байгууллагууд шалгалт хийхээр болов
 
Ямартай ч банкны удирдлагуудыг хүний эрх ноцтойгоор зөрчсөн гэдгийг нь баталсан. Хэдийгээр «Капитал» банкны хуулийн зөвлөх өөрсдийгөө хууль зөрчөөгүй гэж мэдэгдэж байгаа ч тэдний зөрчил дутагдлыг 13 үйлдлээр илрүүлсэн нь баримттайгаар байдаг юм.
 
Өдрийн хоолоо алдахгүй гэсэн эмэгтэй ажилчид үр хөндүүлж, улмаар бие сэтгэлээрээ хохироод байгаа учраас ХЭҮК-оос гадна хүний эрхийн төлөө гэсэн бүх байгууллага «Капитал» банкинд шалгалт явуулахаар болжээ.
 
Тэгэхээр Б.Ундармаа захирал хүний эрхийг ноцтойгоор зөрчсөн байна. Мөн «Капитал» банкны эл үйлдлийг хүн амаа өсгөх гэсэн төрийн бодлогыг эсэргүүцэж буй нэг хэлбэр гэж мэргэжлийн хүмүүс дүгнэж байна.