Агаарын бохирдол гамшигийн хэмжээнд хүрчихлээ.  Үүнийг сэтгүүлчид ярьж, хэлж, бичиж, нийтэлж, олон нийтэд хүргэсээр байгаа.  Харамсалтай нь сайд нар, дарга нар агаарын бохирдол буурсан гэж хэдэн тоо хэлж байгаагаас өөр нүдэнд харагдахаар зүйл хийхгүй байна.  

Гэр хорооллын  180 000 орчим айлын  120 000-ынх нь зуухыг “Өлзий”, “Хас” зуухаар сольсон. Үлдсэнг нь энэ жилдээ багтаад солино гэж мэдээлж байсан.   120 000 айлын зуухыг сольсноор агаарын бохирдол  25 хүртэл хувиар буурсан гэж байгаа.  Гэтэл та бүхэн өнөөдөр гадаа гараад хараарай.  Буураагүй харин ч нэмэгдчихээд байна.  Тэгэхээр энэ тоон судалгаа чинь худлаа бол таарлаа С.Оюун сайдаа.  Үлдсэн 65 000  айлын зуухыг энэ жилдээ амжиж солихоор агаарын бохирдол бараг 50 хувиар буурчих юм гэсэн. Эргэлзэж байна.

Гэр хорооллын айлууд нэгэнт түүхий нүүрс, папришик түлээд байгаа энэ цаг үед  түлэхийг нь болиулж чадахгүй байгаа бол  тэдгээр  айлуудыг төвийн шугамтай нь холбоод халаалттай, халуун хүйтэн устай  болгочих хэрэгтэй юм. Ийм ажилд агаарын бохирдлыг бууруулах ажилд зарцуулж байгаатай дүйх хэмжээний мөнгө орно.  Ингэснээр  хэсэг нөхөд халаасаа зузаатгах бус айлууд  хөрсөө,  агаартайгаа бохирдуулахгүй  байх эерэг талтай. Мэдээж хэрэг урамшуулаад байвал хэн ч гэсэн  дуртай л байна.  Гэр хорооллын нэг айлыг  хашаандаа хоёр мод тарьснийх нь төлөө  төвийн шугамд нэн түрүүн холбоод өгчихбөл  агаарын бохирдлоо ганцхан жилийн дотор бууруулаад зогсохгүй өчнөөн олон тэрбум төгрөг хэмнэчихнэ.  Өнөөдөр  ямар ч айл хашаандаа хоёрхон мод тарьчих зайтай бөгөөд боломжтой байна.  Үүнийг нь л дэмжээд  өгчих хэрэгтэй юм. Үүний дараа цахилгааны үнийг хямдруулан иргэдийг халаалтаа нүүрсээр биш цахилгаанаар шийдэхэд агаарын бохирдол бууруулахад жинтэй хувь нэмэр орно.

Агаарын бохирдол жилийн 4 улиралд байсаар байдаг.  Тэгвэл агаарын бохирдол бууруулах ажлыг зөвхөн өвөл гэлтгүй  жилийн дөрвөн улиралдаа хийх хэрэгтэй.  Тухайлбал  хотын замыг тогтмол чийглэх.  Хотын төвийн, захын гэлтгүй бүх замыг чийглэн, айл өрх, албан байгууллага бүр гаднаа  зүлэг, мод тарьж байвал  хэмжээгээр агаарын бохирдол буурах болно.  

Харин хотын захиргаанаас түлшний дутуу шаталттай хуучин автобусыг халж, эко түлшээр ажилладаг автобус, троллейбусыг нийтийн тээврийн үйлчилгээнд явуулах хэрэгтэй.  Хөвөн их гардаг модыг бус мөнх ногоон гацуур мод тарих ажиллагааг идэвхижүүлэх хэрэгтэй юм.  Мөн  мод тарьсан газрыг ухаж сэндийчсэн байгууллага, иргэнийг торгоод байх хэрэгтэй.

Мөн хуучин машин унадаг, агаар ихээр бохирдуулдаг иргэдийг  өмчөө хаяснийх нь төлөө урамшуулдаг, шинэ машин авахад нь  хөнгөлөлт үзүүлдэг байвал агаарын бохирдолд хувь нэмэр оруулж байгаа автомашины утаа эрс буурах болно.  

Тэгвэл агаарын бохирдолд айл өрхүүд ч гэсэн анхаарлаа хандуулчихад болох гээд байгаа юм. Өөрөөр хэлбэл гэрийн дулааны 50-55 хувийг хана, тааз, шал цонхоороо алдчихдаг.  Тиймээс гэр орон, байр сууцаа сайтар дулаалсан байхад түлшинд зарах мөнгө  хэмнэгдэхийн зэрэгцээ нийслэлд нэмэгдэх утаа ч багасна гэсэн үг.  

Хэн хэн нь дор бүрнээ  хариуцлагатай ажиллаад агаарын бохирдолоо бууруулахгүй бол өнөөдөр та би, бидний үр хүүхэд энэхүү хорт агаараар амьсгалж эрүүл мэндээрээ  их хэмжээгээр хохирч байна.

Тиймээс  бүх нийтээрээ агаарын бохирдлын эсрэг хөдөлцгөөе.

Т.Энгүүн