-Хэрвээ Х.Баттулга иргэдийн  өрийг дарлаа гэхэд Монгол Улс 6-хан сар тэснэ гэдгийг УИХ-ын гишүүн Б.Жавхлан Ерөнхийлөгчийн сонгуулийн үеэр ард олон хийгээд АН-ын нөхдүүдэд удаа дараа мэдэгдэж байсан удаатай-

Монгол Улсын тав дахь Ерөнхийлөгч Х.Баттулга өнгөрсөн Ерөнхийлөгчийн сонгуулиар 3 сая иргэнийхээ  өрийг нэг удаа тэглэж өгнө хэмээн амлаж олон хүний саналыг өөртөө авснаар ийнхүү төрийн тэргүүний сэнтийд заларсан. Угтаа бол өдрийн хоолоо арай ядан залгуулж буй ард түмэн Ерөнхийлөгчийг өрнөөс нь салгана гэж итгэсний үр дүнд түүнийг сонгож саналаа өгсөн хэрэг. Тэгвэл  шинэхэн Ерөнхийлөгчийг ажлаа аваад нэг сар ч болоогүй байхад ард олон түүнээс өр тэглэхийг шаардаж амлалтаа биелүүл гэж шахаж эхэллээ.

Тодруулбал, өчигдөр “Өргүй Монгол сонгогч” ард түмний хөдөлгөөнөөс МУ-ын Ерөнхийлөгч Х.Баттулгад амлалтыг нь ийнхүү сануулж шаардлага хүргүүлж байгаа талаараа олон нийтэд мэдээлэл хийсэн юм. Тэд хэлэхэдээ “Ардчилсан нам Ерөнхийлөгчийн сонгуульд нэр дэвшигч Х.Баттулгад даалгавар өгөхдөө цалингийн, малчны, тэтгэврийн, сургалтын зээлийг чөлөөлөх ёстой. Одоо байгаа зээлийн өрийн үлдэгдлийг “Эрдэнэс тавантолгой” компанийн ногдол ашгаар төлөх бүрэн боломжтой гэж өөрсдөө гаргалгаа гаргасан байсан. Нийт 5.8 их наяд төгрөгийн зээлийг чөлөөлөх боломж байна гэсэн. Ийм учраас бид энэ амлалтаа биелүүлэх ёстой” гэсэн шаардлагыг Ардчилсан намын дарга С.Эрдэнэд мөн тавьж байна гэлээ”. Ямартай ч одоогоор тус хөдөлгөөнд 30 гаруй иргэн нэгдээд байгаа бөгөөд цаашид ч амлалтыг ажил хэрэг болгох чиглэлд тууштай тэмцэх зорилгоор иргэдийг олноор оролцохыг уриалж байв. Мэдээж өнөөдөр АН-ын энэхүү худал хуурмаг, сонгогчдын итгэлийг олж авахын тулд поп амлалт өгч эрх мэдлийг гартаа оруулсан нь АН төдийгүй Ерөнхийлөгчийг хүртэл ацан шалаанд оруулж буй хэрэг.

Хэрвээ Х.Баттулга тус өрийг дарлаа гэхэд Монгол Улс 6-хан сар тэснэ гэдгийг УИХ-ын гишүүн Б.Жавхлан Ерөнхийлөгчийн сонгуулийн үеэр ард олон хийгээд АН-ын нөхдүүдэд удаа дараа мэдэгдэж байсан удаатай. Тухайлбал, тэрбээр “АН-ын мэдэгдлээр иргэдийн нийт зээлийг төр батлан даалтанд авбал иргэд зээлээ төлөхгүй ХАРЗНАХ сөрөг хүлээлт бодитоор шууд үүснэ. Хэдийгээр энэ бүхэн Их хурал, Засгийн газраар явах асуудал боловч нэгэнт олон нийтийн дунд ийм хүлээлт, сонголт бий болчвол удирдах эдийн засгийн боломжгүй учраас төвөгтэй байдал үүснэ. Үүнд иргэдийг буруутгах зүйл огт байхгүй, зүй ёсны эдийн засгийн хариу үйлдэл байх болно. Харин үүний үр дүнд 6 сарын дараанаас банкны системийн нийт зээлийн 44% нь чанаргүй болж ирнэ! Энэ хэмжээгээр өөрийн хөрөнгөө идэж эхэлмэгц хамгийн багаар бодоход 25%-аар эрсдлийн сан байгуулахад 1.4 их наядын алдагдал нийт банкууд хүлээх болно. Жилийн дараа 100% алдагдал хүлээж, систем бүхэлдээ гацаанд орох өндөр эрсдэл бий болно. (зээл нь 5.6 их наяд бол өөрийн хөрөнгө үүнээс 45%-аар бага буюу 3.1 их наяд гэдгийг онцгой анхаарах!!!) За дээрээс нь яг энэ үеэр ОУВСангийн банкны системийн активын дахин үнэлгээний хяналт шалгалтын үе таарна. Уг нь манай иргэдийн зээл 95%-ийн эргэн төлөлттэй хамгийн бага эрсдэл бүхий багц байдаг! Ингээд 6 сарын дараанаас банкуудын зээлжих зэрэглэл огцом буурна, энэ нь улсын зээлжиих зэрэглэлд шууд нөлөөлөхөөс гадна банкны системийн төдийгүй гадаад өрийн тогтворгүй байдал үүснэ.  Мөн яг 6 сарын дараа өмнөх ЗГ-аас үүссэн богино хугацааны Чингис бондын 500 сая ам.долларын өр төлөх хугацаа давхцана” хэмээн анхааруулж байсан ч АН болон Ерөнхийлөгчийн зүгээс хүлээж авалгүй өр төлөх боломж, гаргалгаа байгаа мэтээр олон нийтэд хэлж байсан нь өнөөдрийн энэхүү үйл явдал. Ямартай ч иргэд Х.Баттулгад хандан өдөр хоног өнгөрөх тусам өрийн хүү нэмэгдсээр байгааг танд итгэж саналаа өгсөн Монголын нийт ард түмний өмнөөс сануулъя.  Тогтсон хугацаанд хариу өгч, тодорхой арга хэмжээ авахгүй бол бид хууран мэхэлсэн нам, худал амласан тантай хатуу хариуцлага тооцохоор тэмцлийн хурц хэлбэрт шилжихийг анхааруулья гэж хэлсэн нь эрхгүй нэгийг бодогдуулах биз ээ.. Товчхондоо бол тэрбээр  өдгөө олон нийтийг хүлээлтийн байдалд оруулж замбараагүй байдал бий болгох нөхцөл байдлыг үүсгэж эхэллээ.

Х.Маргад

www.erennews.mn