Ерөнхийлөгч Х.Баттулга ба Ерөнхий сайд У.Хүрэлсүхийн удирдаж буй УИХ дахь МАН-ын 32-ын бүлгийн  гишүүд АТГ-ын дарга Х.Энхжаргалыг чөлөөлж, оронд нь өөр хүн томилохоор үндсэндээ санал нэгдээд буй тухай эх сурвалж өгүүлж байна. Учир нь Ерөнхийлөгч  Х.Баттулга ч, шинээр томилогдсон Ерөнхий сайд, Хууль Зүй, Дотоод Хэргийн сайд ч нийгэмд шударга ёсыг тогтоох чиглэлээр идэвхтэй ажиллана гэдгээ зарласан бөгөөд үүний тулд АТГ-ын дарга, ТЕГ-ын дарга нарыг өөрчлөх шаардлага тулгарч буй билээ. Х.Энхжаргал УИХ-ын дарга М.Энхболд, Ерөнхийлөгч асан Ц.Элбэгдорж нарын ойрын хүн гэх яриа улс төрийн хүрээнд байдаг бөгөөд өөрөө ч үүнийгээ нэг их үгүйсгэдэггүй. Ерөнхийлөгч асан Ц.Элбэгдоржийн санал болгосны дагуу Х.Энхжаргал нь 2016 оны 7 сарын 8-нд УИХ-ын чуулганы нэгдсэн хуралдаанд оролцсон гишүүдийн 88.1 хувийн саналаар Х.Энхжаргалыг Авлигатай Тэмцэх Газрын даргаар томилсон юм. Ерөөс түүнийг АТГ-ын даргаар томилсон шалтгаан ч тун их эргэлзээтэй бөгөөд өмнөх дарга Н.Ганболд нь "Бие муу, тэтгэвэртээ гармаар байна" гэх үндэслэлээр чөлөөлөгдөх өргөдөл гаргасан байдаг. Гэтэл Н.Ганболд нь өдгөө Тагнуулын Ерөнхий Газрын Цэргийн Тагнуулын Газрын даргаар ажилладаг. Н.Ганболдынхоор бол Тагнуулын Ерөнхий Газрын Цэргийн Тагнуулын Газрын даргын албан тушаал бие муутай, тэтгэвэртээ гарсан хүний хийдэг ажил юмуу гэмээр. Юутай ч АТГ-ын дарга Х.Энхжаргалыг чөлөөлөхөөр Ерөнхийлөгч болон УИХ дахь МАН-ын 32-ын бүлэг санал нэгдсэн байна.

 

АТГ-ын дарга Хүрэлсүхийн Энхжаргал нь 1964 онд Улаанбаатар хотод төрсөн.

1972-1982 онд Ерөнхий боловсролын сургууль, 1982-1987 онд НАХЯамны дэргэдэх Цэргийн дээд сургуулийг хуульч мэргэжлээр, 1995-1996 онд Төрийн захиргаа удирдлагын хөгжлийн институтыг Төрийн удирдлагын менежерээр тус тус дүүргэсэн.

Тэрээр Налайх дүүргийн Цагдан сэргийлэх хэлтэст өмчийн төлөөлөгч, ахлах төлөөлөгч, Эрдэнэт хотын Цагдаагийн хэлтэст Эдийн засгийн ахлах төлөөлөгч, Төв аймгийн Цагдаагийн газрын дэд дарга, дарга, Баянзүрх дүүргийн Цагдаагийн хэлтсийн дарга, Замын цагдаагийн газрын дарга, Цагдаагийн Ерөнхий Газрын Мэдээлэл технологийн төвийн даргаар ажиллаж байсан. 2016 оны 7-р сараас АТГ-ын даргын үүрэг ажлыг гүйцэтгэж буй юм. УИХ-ын Дэгийн тухай хууль, мөн Авлигын эсрэг хуульд зааснаар Монгол Улсын Ерөнхийлөгч өөрийн бүрэн эрхийн хүрээнд АТГ-ын даргад нэр дэвшигчийн нэрийг УИХ-д өргөн мэдүүлсэн бол долоо хоногт багтаан хэлэлцэхээр заасан байдаг.

 

П.Энхмандах

sonin.mn