Аюулгүй амар тайван амьдрах баталгаа алга. Хэн нэгний хариуцлаггүй буруутай үйлдлээс болж эрүүл мэнд амь насаараа хохироод үлдэж байгаа иргэдийн эрх ашгийг хэн хамгаалах вэ?

Хамгаалуулах нь бүү хэл иргэд наад захын хүчин зүйлсээс өөрстийгөө  хамгаалж чадахгүйд хүрч байна.  Баригдаж буй барилгын доогуур явахаар төмөр унаж аминд нь хүрнэ.  Дархлаа тогтоох зорилгоор вакцин хийлгэхээр тахир дутуу болгоно. Хэн нэгний гарт амиа алдвал суурь өвчтэй гэсэн дүгнэлтээр аргацааж өнгөрөөнө. Шударга, ухаалаг,  энэрэнгүй зүйл гэж хаана ч алга.

 

Хамгийн ойрын жишээ өчигдөр өглөө баригдаж байсан барилгын 20 давхраас бэхэлгээний төмөр Land Cruiser-200 маркийн автомашин дээр  унаж  жолооч болох 36 настай залуу харамсалтайгаар амиа алдлаа. Тэрээр Эдийн засгийн хөгжлийн яамны жолооч байсан бөгөөд осол гарах үед газар дээрээ нас баржээ. Энэ бол хамгийн ойрын жишээ. “Үхсэний хохь амьдын зол” гэсэн хатуу боловч үнэн үг энэ нийгэмд  жинхэнэ утгаараа үйлчилж байх шиг байна.

 

Тухайлбал Шүүх шинжилгээний үндэсний төвийнхөн дээрх үгийг баталж байгаа мэт. Учир нь энэ байгуулагын эмч нарын дүгнэлт хичнээн  эцэг эх, үр хүүхдийн нулимсыг барж сэтгэлийг нь эмзэглүүлж байгаа бол.

 

Жишээ татвал : Хоёр өдрийн турш найз залуудаа зодуулсан 21 настай охины үхлийн шалтгааныг гадны нөлөөгүй “суурь өвчтэй байсан нь үхлийн шалтгаан болсон” гэсэн дүгнэлтийг Шүүх шинжилгээний үндэсний төвөөс гаргаад байсан юм. Энэхүү дүгнэлтийг  талийгаач охины ар гэрийнхэн болоод ард түмэн эсэргүүцэж улмаар МУ-ын Ерөнхийлөгчийн сонорт хүрсэнээр одоо л нэг шударга үнэн шийдэгдэх нь гэсэн горьдлого төрж байв.  Тиймээс  тухайн хэрэгтээ  Улсын ерөнхий прокурор Д.Дорлигжав биечлэн  танилцаж, талийгаачийн үхлийн шалтгааныг тогтоохоор дахин задлан шинжилгээ хийж, шинжээчийн дүгнэлт гаргах үүрэг өгсний дагуу Шүүхийн шинжилгээний үндэсний төвөөс өөр шинжээчийн бүрэлдэхүүн томилсон.  Тэгвэл шинэ шинжээчид охины үхлийн шалтгааныг мөн л гадны нөлөөгүй гэж гаргажээ. Өөрөөр хэлбэл энэхүү дүгнэлт нь өмнөх шинжээч эмч нарын дүгнэлттэй санал нийлсэн гэсэн үг.

Шүүхийн шинжилгээний төв дүгнэлтийн талаар "Манай шинжээчдийн баг ажиллаж байгаа. Гэхдээ албан ёсны эцсийн хариу гарч хууль, цагдаагийнханд өгөөгүй байгаа" гэсэн тайлбарыг өгчээ.

 

Худал хэлсэн хүнд өчигдрийн гарсан осолтой холбон тайлбарлахад  бэхэлгээ төмөр унасан нь гадны хүчин зүйл болж гэмтэл авч амиа алдсан залуу суурь өвчтэй гэсэн дүгнэлт гарч олны дургүйцлийг хүргэх вий.   

 

Энэ мэт хэн нэгэн хариуцлагагүй этгээдүүдийн буруугаас үүдэн гэм зэмгүй иргэд амь насаа алдсаар байна.  Том  төрөөс  ухаалаг төрд шилжинэ хэмээн дээдсүүд дээгүүрээ хэлэлцэж байх зуур 3 сая хүрэхгүй цөөхөн хэдэн монголчуудад эрүүл аюулгүй амьдрах баталгаа алга болж эрлэг рүү золгүй байдлаар явсаар байх уу. Тиимээс л  ухаалаг төрөөс гадна ухаалаг нийгэм үгүйлэгдэж эхэллээ.

Б.Цацрал