Нөгөө талаар хүндээр өвдөөд буй эдийн засгаа эмчлэх аргаа мэдэхгүй алмайрч суутал Намбарын хүү их улстөрийн хаалгыг өшиглөж орж ирэхээр зэхэж буй сураг айлаас айлд, саахалтаас саахалтад тарж эхэллээ. Энэ сураг чимээг улстөрийн томоохон хүчнүүд мэдээжийн хэрэг таагүй хүлээж авахын зэрэгцээ битүүхэн айдаст автаж сууна.

 

Өөрийнх нь намын нөхөд ч айдастай байгаа. Тэр ч бүү хэл Ц.Элбэгдорж алс хэтийн /2017 он/ айдаст автаж байгааг нуух юун. Шуудхан хэлэхэд улстөрийн том жижиг бүлэглэлүүд дотроо ямар нэгэн бодол тээж, бодлого боловсруулж суугаа нь дамжиггүй. Тэр үнэхээр улстөрд өөрийнхөө нөлөөлийг хэзээ ч арилшгүй тогтоосон нэгэн үү.

 

Эсвэл тэр хэнийг ч хайрлахгүй улстөр хийдэг жудаггүй нэгэн үү гэдэг асуулт зүй ёсоор гарч таарна. Тус намын шинэхэн генсек Т.Дугаржав намын дарга тань хэзээ хүрэлцэн ирэх вэ гэсэн асуултад “Эрх чөлөөт Монгол Улсын иргэн эх орон, эцэг эх, үр хүүхэд, хань ижилдээ ирэхээр яарч байгаа нь ойлгомжтой.

 

 Би бол намын даргын маань өвдсөн бие нь эрүүл саруул болоод бүр хурдан ирээсэй гэж хүсч байна” хэмээн даруухан хариулт өгсөн юм билээ. Тун удахгүй хаврын тэргүүн сар шинийн нэгэн, бидний уламжлалт Цагаан сар болно. Тиймээс энэхүү уламжлалт баяраар Н.Энхбаяр ээж аавдаа золгохоор далайн чанадаас ирж таарна.

 

Нэгэнт бие нь илааршсан. Тэр их улстөрийн хаалгыг тогшиж бус өшиглөж орж ирэх нь дамжиггүй. Тэр эдэлдэг ялаа эдэлчихсэн, мөр зэрэгцэн “тулалдаж” явсан нөхдийнхөө мөсийг таньчихсан, өргөст торны цаанаас их улстөрд хүчтэй бүлэглэл бий болгочихсон.

 

Ерөнхийдөө хал үзэж халуун чулуу долоосон олон давуу талаар тэр улстөр хэмээх их хаалгыг өшиглөж орж ирнэ. Тодотговол ямар ч айдасгүйгээр, аймшиггүйгээр орж ирнэ гэсэн үг. Гэхдээ түүнд өрсөлдөгчдийн зүгээс бэлдсэн элдэв шантааж байгааг тэр хэрхэн ч мартаж болохгүй.

 

Түүний ойр орчмынхон. Хамтран зүтгэгчдэд халгаатай улстөрийн төлөвлөгөө ч бэлдсэн байхыг үгүйсгэхгүй. Юутай ч Н.Энхбаяр айсуй хаврын уринтай хамт наашилж буйг эх сурвалж дуулгасаар.