Улаанбаатар хотын замын хөдөлгөөний ачааллыг бууруулах, нийтийн тээврийн үйлчилгээг сайжруулах зорилгоор зарим автобусны буудлыг шилжүүлэхээр төлөвлөжээ.

Өнөөдрийн байдлаар Энхтайваны өргөн чөлөө, Баруун дөрвөн замаас Зүүн дөрвөн замын хооронд 18-22 чиглэлийн 260-300 их багтаамжийн автобус зорчдог байна. Зарим автобусны маршрут давхардсанаас хотын төвийн замын хөдөлгөөний ачаалал нэмэгддэг аж. Үүнээс үүдэн автобусууд буудал руу гүйцэт оролгүй зорчигчоо буулгах зэрэг зөрчил байгаа учраас  зогсоолуудыг ээлжлэн зогсоох маягаар зохион байгуулахаар төлөвлөжээ. .

Тодруулбал, Хүч бөөний төв, Бөхийн өргөөний буудлыг нэгтгэж  Хүнс, хөдөө аж ахуй, хөнгөн үйлдвэрийн яамны урд талбайд шинээр 1 зэрэглэлийн зогсоолын талбай гаргах, Улаанбаатар Их дэлгүүр, Хүнсний 20-ын урд талын автобусны буудлыг нэтгэж шинээр Улсын их дэлгүүрийн баруун урд зогсоол байгуулахаар төлөвлөсөн байна.

Улсын их дэлгүүрийн баруун урд байгуулах зогсоол нь Баруун 4 замын зогсоолоос 500 метр, дараагийн зогсоол Санктпетрбург хүртэл 980 метр зайтай байх юм. Мөн Энхтайван найрамдлын ордны урд талын автобусны зогсоолыг таксины зогсоол болгохоос гадна Амарсанаагийн гудамж “MAXMALL” дэлгүүрийн баруун талд 2-р зэрэглэлийн зогсоол шинээр хийхээр төлөвлөжээ.

Мөн Баруун дөрвөн замаас, Зүүн 4 зам хүртлэх 5 зогсоолд өөрчлөлт хийснээр зогсоолуудын ачааллыг 50 хүртэл хувиар бууруулах боломжтой гэв. Зогсоолуудыг өөрчлөх, шинээр зогсоол хийх ажлыг дөрөвдүгээр сараас эхэлнэ.

Х.Даваа

,