Нийслэлийн Иргэдийн Төлөөлөгчдийн Хурлын ээлжит чуулганд Боловсрол, Шинжлэх Ухааны сайд Л.Энх-Амгалан боловсролын үнэлгээний нөхцөл байдлыг өнөөдөр танилцууллаа. 

2022 онд ерөнхий боловсролын сургууль болон сургуулийн өмнөх боловсролд

  1. сургууль, цэцэрлэгийн 
  2. багшийн
  3. суралцагчийн үнэлгээг хийсэн. 

Нийслэлийн хэмжээнд дээрх үнэлгээнд 139 сургуулийн 10,872 багш, 999 мянган суралцагч, 268 цэцэрлэг, 2,162 багш, 28,555 сурагч тус тус хамрагдсан байна.

Цаашид үнэлгээг давтамжтайгаар хийнэ. Тодруулбал, хичээлийн шинэ жил эхлэхэд гарааны, дунд үед явцын, хичээлийн жилийн эцэст барианы үнэлгээ хийх аж.

Сайд Л.Энх-Амгалан "Боловсролын чанарын үнэлгээ Монгол Улсад анх удаа хийгдсэн. Өмнө хийгдэж байсан судалгаа, чанарын үнэлгээнүүд нь цэцэрлэг, сургуулийн өөрийн гүйцэтгэлд суурилж байжээ. Өөрийн гүйцэтгэлийн үнэлгээ, хөндлөнгийн үнэлгээний үр дүн нь 40-70 хувь зөрдөг. Тиймээс өмнө нь зарлагдаж байсан үзүүлэлтүүд нь үндэслэл муутай бөгөөд тавьсан зорилтод хүрч чадаагүй, бодлогын үр дүн гараагүй байсан. 

Сургууль, цэцэрлэг, хөтөлбөр, багшийн чадвар зэрэгт үнэлгээ хийхэд дээд эрэмбийн ур чадвар буюу 

  • Асуудал шийдвэрлэх чадварыг суулгадаггүй
  • Хүүхдийг мэдээлэлтэй ажиллах чадвар суулгадаггүй
  • Хамтран суралцах ур чадварыг эзэмшүүлж чадахгүй байна зэрэг үр дүн гарлаа. 

зураг

 

Эдгээр нь 21 дүгээр зууны дээд эрэмбийн ур чадвар бөгөөд манай хөтөлбөр, сурах бичиг, багшийн арга зүй олгож чадахгүй байгаа учраас Монгол Улсын боловсрол хоцрогдож байгаа. 

Өнгөрсөн нэгдүгээр сард Дэлхийн банкнаас зарласан тайлангаас үзэхэд, Монгол Улс 12 жилийн боловсролын тогтолцоонд шилжсэн мөртлөө 12 дугаар анги төгсөж байгаа хүүхэд наймдугаар ангийн хүүхдийн ур чадвартай гарч байна. Үндсэндээ бид 3-4 ангийн хоцрогдолтой явж байна" хэмээв. 

зураг

 

зураг

 

Мөн боловсролын салбарын хөрөнгө оруулалтын талаар тэрбээр мөн танилцуулав. 

Тухайлбал, 2022 онд 2.2 их наяд, 2023 онд 2.6 их наяд төгрөгийн хөрөнгө оруулалтыг боловсролын салбарт хийхээр төсөвлөжээ. 2.6 их наяд гэдэг нь Монгол Улсын дотоодын нийт бүтээгдэхүүний 4.5 хувьтай тэнцэж, төсвийн урсгал зардлын 16-18 хувьд хүрч байгаа аж. Энэ үзүүлэлтээрээ дэлхийн улс орнуудын жишигт хүрсэн гэдгийг сайд Л.Энх-Амгалан хэлсэн.

Түүнчлэн тэрбээр "Нэг сурагчид ногдож буй боловсролд зарцуулагдаж буй мөнгө дэндүү бага байна. Одоогийн байдлаар 350-400 ам.доллар байгаа. Гэтэл хөгжсөн улс орнуудад 8-12 мянга орчим ам.доллар байдаг. Өөрөөр хэлбэл, хөгжсөн орнуудаас 15-18 дахин мөнгийг бид боловсролд зарцуулж байна" гэлээ.

зураг