8-р сарын 22-нд Баянхонгор аймагт болсон “Хөх Монголын хөх туг” чуулга уулзалтын үеэр Монгол Улсын Ерөнхийлөгч асан, МоАХ-ы дарга Х.Баттулга үг хэлжээ.

Энэ үеэрээ тэрээр: “Бидний газрын доорхи баялгийг авахын тулд бидний газар нутгийн эзэн биш болгож байна. Энд нам хамаагүй. Нам дамнасан санхүүжүүлдэг баялгийн эзэд. Өнөөдөр биднийг намаар нь талцуулж, хооронд нь зодолдуулж байгаа, үзэн ядуулж байгаа. Тэр муу МАН-ын тэр, энэ муу АН-ын тэр гэх мэтээр. Гэтэл ердийн малчин хүнд нам ямар хамаа байна аа! Бид нар яагаад 33 жил нам нам гэж талцсаныхаа хариуг ядуу гэдэг шийтгэлээр авч байгаа юм. Өнөөдрийн “Хөх Монголын хөх туг” гэдэг маань нам хамаагүй, Монголчуудын цугларалт шүү. Та бүхнийг дэмжинэ гэдэгт итгэж байна.

Баялагтаа бид эзэн нь байх ёстой. Тийм  ч учраас та бүхэн намайг 2017 онд дэмжиж, Монгол Улсын Ерөнхийлөгч болгосон, Монгол орон даяар дэмжсэн. 670 мянган хүний саналыг авсан хүн өнөөдөр нам ярьж болохгүй ээ...

Өнөөдөр би харин Монголчуудаа ярих, тэднийхээ төлөө санаа зовох ёстой. Яагаад гэвэл Монгол Улсын Ерөнхийлөгчийн албыг 4 жил хашна гэдэг чинь өөрөө хүний толгой, тархийг томруулдаг, улс орноо боддог... Тийм албан тушаал юм байна. Ерөнхийлөгчийн албан ажлын хүрээнд явж байхдаа би АНУ, БНХАУ, ОХУ-тай стратегийн түншлэлийн гэрээнүүдийг байгуулсан. Тэр том орнуудын Ерөнхийлөгчтэй нэг зиндаанд уулзаж байлаа. Тийм хүн өөрчлөгдөх ёстой.Бид газар нутгийнхаа хэмжээгээр дэлхийд 17-т, баялгаараа 10-т улсын цөөхөн Монголчууд. 80 сая малтай. Яагаад бид ядуу байгаа юм бэ? Яагаад гэвэл бид халамжийн улс болсон. Төрийн бодлого биднийг ийм хэмжээнд авчирсан. Худалдагдаагүй нам, худалдагдаагүй ТББ Монголд цөөхөн. Тэдний нэг нь Монголын Ардчилсан Холбоо. Та нарын үүсгэсэн энэ холбоо 33 жил яг чиг шугаман дээрээ байгаа учраас би удирдаж яваа” гэсэн байна.

С.Сарнай

sonin.mn