Ардчилсан Эмэгтэйчүүдийн Холбооны ээлжит Ерөнхийлөгчийг сонгох Дээд чуулган 2023 оны 09-р сарын 25-ны өдөр хуралдаж 21 аймаг, 9 дүүргийн 600 гаруй төлөөлөгч оролцсон. Улмаар сонгуульд Амгалангийн Адъяасүрэн, Батбаярын Жаргалан, Бадамдоржийн Пунсалмаа, Домбонгийн Үүрийнтуяа нарын нэр дэвшигчид өрсөлдөж 569 хүчинтэй саналаас 285 санал буюу 50,8%-ын саналаар Батбаярын Жаргалан ялалт байгуулсан үр дүнг дээд чуулганаар баталсан билээ.

Хачирхалтай нь  Ардчилсан Эмэгтэйчүүдийн Холбооны Ерөнхийлөгчийн сонгуульд нэр дэвшсэн Н.Одонгуа, Д.Эрдэнэсувд, Ц.Уянга нар санал хураалт болохын өмнөхөн: "Хайрцаглагдчихсан байна. Би жүжгийн дүр болохгүй" гэх мэт хачирхалтай тайлбар хэлээд нэрээ татацгаасан юм.

Нэгэнт л хайрцаглагдсан сонгуульд нэр дэвшиж, жүжгийн дүр болмооргүй байсан юм бол анхнаасаа нэр дэвшихгүй байх сонголт байсан л баймаар. Тэгээд ч эдгээр нэр дэвшигчид сонгуульд нэр дэвших дэнчингийн 60 сая төгрөгийнхөө зарим хэсгийг хандивлагч, найз нөхдөөсөө босгосон байдаг.

Гэтэл хандивлагчдынхаа дэмжлэгийг юу ч биш гэж үзэн, айлын эрх охин шиг "Энэ сонгууль муухай болох нь. Оролцохоо болилоо" гэх нь хэр ёс зүйтэй үйлдэл юм бол? Ер нь тухайн нэр дэвшигчийн санаанд яв цав таарсан, 100 хувь таалагдсан сонгууль дэлхий дээр болдог ч юм уу? Санаанд нь нийцээгүй гэх төдийд л нэрээ татаад байвал улс төрчийн үзэл бодол гээч зүйл хаана орших юм бол? 

 Ц.Уянга гэхэд л чухам үзэл бодолдоо үнэнч байх тухай яриад байдаг биш билүү? Нөгөөтэйгүүр зарим нэр дэвшигчид нэрээ татах нэрээр тохироо, бизнес хийн, дэнчинд тушаасан 60 сая төгрөгөө нугалж авсан байж болзошгүй тухай эх сурвалжууд өгүүлж буй юм. Үүнийг ч шалгахад илүүдэхгүй биз ээ.