Боловсролын Үнэлгээний Төв(БҮТ)-өөс Ерөнхийлөгчийн илгээлт-2100 тэтгэлэгт хөтөлбөрийн сонгон шалгаруулалт, шинэчилсэн зарим журмын талаар өнөөдөр мэдээлэл өглөө. 

Уг тэтгэлэг нь тухайн сум, баг, дүүрэг, хороо бүрээс Элсэлтийн Шалгалт(ЭШ)-ын хамгийн өндөр оноо авсан шалгуулагчид мөн олон улсын олимпиадад медальт байрт шалгарсан суралцагчдыг дэлхийн топ их дээд сургуулиудад тэтгэлгээр суралцуулдгаараа онцлог юм. 

Тэтгэлгийн гол шалгуурууд: 

  • Хэмжээст онооны дунджаар хамгийн өндөр оноо авч, сум, хороондоо тэргүүлсэн байх. Үүнд Гадаад хэл-Математик, Гадаад хэл-Хими, Гадаад хэл-Физик, Гадаад хэл-Биологи гэсэн хичээлүүд хамаарах ба хэмжээст онооны дундаж нь 550-с дээш байх ёстой аж. Олон улсын шалгалтын дүйцүүлсэн оноо үүнд хамаарахгүй юм байна.
  • Тухайн жилийн ЭШ-д хамрагдсан байх 
  • Сүүлийн гурваас доошгүй жил ЕБС-ийн хамран сургах тойргийн дагуу харьяалагдах сум, хороондоо суралцаж төгссөн байх 

Эдгээр шалгуурыг хэрхэн хангасан эсэх мэдээллийг:

  • Улсын Бүртгэлийн Ерөнхий Газар(УБЕГ)-т бүртгэлтэй байгаа тухайн суралцагчдын албан ёсны гэрийн хаяг, оршин суугаа газрын мэдээлэл 
  • Боловсролын мэдээлэл технологийн төвөөс тухайн суралцагчийн 12 жилийн хугацаанд буюу сүүлийн гурван жилийн хугацаанд ямар сургуульд суралцсан, шилжилт хөдөлгөөн хийсэн эсэх мэдээлэл
  • БҮТ-ийн элсэлтийн шалгалтын дүн зэрэг мэдээллүүдийг нэгтгэж жагсаалт зарлагддаг аж. 

Элсэгч ilgeelt.eec.mn сайтаар ороод өөрийн бүртгэлийн дугаар нууц үгээ хийгээд дээр дурдсан мэдээллүүдээ өөрөө хянах боломжтой аж.