Трамвайн эхний шугам "Степпе Арена"-гаас Сүхбаатарын талбай хүртэл үргэлжлэх юм байна.

Энэ талаар "Улаанбаатар Трамвай төсөл"-ийн удирдагч Б.Ану-Үжин "Улаанбаатар трамвай төслийн ТЭЗҮ-ийн гүйцэтгэл 20%-тай байна.

Улаанбаатар хотод трамвайны хоёр шугамтай байх юм. Эхний шугам нь Хан-Уул дүүргийн нутаг дэвсгэр, Степпе Аренагаас Сүхбаатарын талбай хүртэл 14.3км урт байна. Яармагийн гол замаар трамвайг явуулна, трасст орсон ногоон байгууламж бүхий талбайг хэвээр үлдээх юм.

Эхний шугамын ТЭЗҮ-ийг 2025 оны дөрөвдүгээр сарын 1-н гэхэд дуусгаж, тендерийг зургаадугаар сард зарлана. 2027 оны аравдугаар сард ашиглалтад оруулахаар төлөвлөөд байна.

Хоёр дахь шугам буюу Сүхбаатарын талбайгаас Зунжин хүртэлх шугамын газар чөлөөлөлт болон бусад ажлыг гүйцэтгэхээр төлөвлөж байна. Хоёрдугаар шугамын зураг төсөл хийгдэж байгаа бөгөөд 2030 онд ашиглалтад оруулах юм.

Трамвай нь Улаанбаатар хотын дөрвөн улиралд тохиромжтой нийтийн тээвэр. Нэг удаад 150-300 хүнийг тээвэрлэх багтаамжтай, дундаж хурд 30км/ц, дээд хурд 6030км/ц. Яармагаас Сүхбаатарын талбай хүртэл трамвайгаар явахад 20-30 минутад хүрнэ гэж тооцоолсон. Ингэснээр Яармагийн авто замын түгжрэлийг 27.5%-аар бууруулна" гэж танилцууллаа.

Яармагийн замаар өдөрт 87,000 орчим автомашин зорчдог байна.