УИХ-ын гишүүн Б.Найдалаа, Боловсролын сайд П.Наранбаяр нар муудаж, зодолдсон талаар мэдээлсэн билээ.

Тэгвэл энэ талаар ЦЕГ-н Хэвлэл мэдээллийн төвөөс дараах тодруулгыг өгчээ. Үүнд,  "Төрийн ордонд Боловсролын сайдыг УИХ-ын гишүүн цохиж, биед нь хохирол учруулсан гэх мэдээллийг 2025 оны гуравдугаар сарын 27-ны 15.00 цагийн орчимд хүлээн авсан.

Уг дуудлага, мэдээлэлд хэрэг бүртгэл нээн, биед учирсан хохирлыг тогтоох бусад нотловол зохих байдлыг тогтоохоор шалгалтын ажиллагааг үргэлжлүүлж байна" хэмээн мэдээлэл өгсөн билээ. 

Тэгвэл Засгийн газрын гишүүний биед халдвал хуулийн ямар хариуцлага хүлээлгэх вэ гэдгийг танилцуулбал ,

Үндсэн хуулийн 29.2. УИХ-ын гишүүний халдашгүй байдлыг хуулиар хамгаална.

Үндсэн хуулийн Дөчин хоёрдугаар зүйл. Ерөнхий сайд, Засгийн газрын гишүүний халдашгүй байдлыг хуулиар хамгаална.

Зөрчлийн тухай хууль

5.3 дугаар зүйл.Хүний биед халдах

1.Хүний биед хохирол учруулахгүйгээр халдаж зодсон бол хүнийг нэг зуун нэгжтэй тэнцэх хэмжээний төгрөгөөр торгоно.

Эрүүгийн хууль

11.6 дугаар зүйл.Хүний эрүүл мэндэд хөнгөн хохирол санаатай учруулах

1.Хүний эрүүл мэндэд хөнгөн хохирол санаатай учруулсан бол дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.

2.Энэ гэмт хэргийг энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн бол дөрвөн зуун тавин нэгжээс хоёр мянга долоон зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас зургаан сар хүртэл хугацаагаар зорчих эрхийг хязгаарлах ял шийтгэнэ.