Түүний аав Л.Дүгэржав Шинжлэх ухааны доктор, профессор, Онц бөгөөд бүрэн эрхт элчин, дипломат, Антарктид тив судалдаг хүн байв. Тэрээр Антарктидад 7 удаа очсон, өмнөд туйлын “ОО” цэг буюу S900–т улсынхаа далбааг мандуулсан, анхны (аяны) монгол гэрийг аваачиж барьсан хүн байв. Тэрбээр бурхан болоод гурван жил болж буйг охин нь яриандаа дурдлаа.

"Төгрөг нуур энержи" ХХК-ийн гүйцэтгэх захирал асан Л.Дүгэржавын охин:

-Зарим хэвлэл мэдээллийн байгууллагаар манай аавыг 1.3 сая ам.доллароор зараад идчихсэн луйварчин мэт асуудлыг хөнджээ. Аав маань “Төгрөг нуур энержи” ХХК-ийг 2005 онд маань байгуулсан. “Утаагүй түлшний үйлдвэр”-ийг “Төгрөг нуурын орд”-д байгуулж, энэ ордын гүйцэтгэх захирлаар ажиллаж, 20 хувийн эзэмшигч байлаа. Хонконгийн хөрөнгийн бирж дээр 2009 онд энэ ордыг 250 сая ам.доллароор худалдсан. Гэхдээ ингэхдээ бидний 20 хувийг зөвшөөрөлгүйгээр авч, цааш шилжүүлсэн. Тухайн үед бид гурван шатны шүүхэд хандаад тусыг эс олсон.

Өнөөдөр 17 жилийн дараа энэ ордтой холбоотой асуудлыг УИХ-ын түвшинд гаргаж ирж, улстөржүүлж байна. Би энэ асуудалд эмзэглэж байгаа тул иргэн хүнийхээ хувьд өөрт байгаа материалыг АТГ-т өгөх нь зөв юм байна гэж бодлоо. Үгүй бол 1.3 сая ам.доллароор зараад идчихсэн мэтээр аавын минь сүнсийг хүртэл амарлиулахгүй байгаад охиных нь хувьд би зовж байна.

Над руу янз бүрийн дугаараас над руу залгаж байна, зурвас бичиж байна. Би амьдармаар байна, үр хүүхэд бий. Би айж байна, надад хамгаалалт хэрэгтэй байна. Би Ардчилсан намын Үндэсний бодлогын хорооны гишүүн.