УИХ-ын чуулганы 2025 оны зургадугаар сарын 2-3-нд шилжих шөнийн хуралдаанаар Л.Оюун-Эрдэнийг Ерөнхий сайдаас огцруулсан. Маргааш нь УИХ-ын гишүүн Х.Тэмүүжин “…Өчигдрийг хүртэл парламентад цөөнх байхгүй байсан. Харин өнгөрдөг шөнөөс эхлээд олонхгүй УИХ-тай болсон.

Хэдий муудлаа, муудлаа гэхэд юмс сайн тал руугаа явдаг гэдэг. МАН Ерөнхий сайдаа огцруулсан, Ерөнхийлөгч Үндсэн хуулийнхаа талд зогсоно гэсэн. АН Сөрөг хүчин болсон шөнө байлаа” гэж цахим хуудастай бичсэн байв.

Тэр үнэн. Тэгж АН нэгэнт сөрөг хүчин болсон. Эрх баригчид хөлөө жийлцэж байх зуурт, нэг талаас дараагийн сүрхий чанга улс төрийн акц, нөгөө талаас нийтийн эрх ашгийн төлөөх зарим санаачилгуудыг гаргаад эхэлжээ. АН-ынхан олны анхаарал татсан, мөн улс төр, бизнес холилдож, ардаа асар их мөнгөний асуудал үүсгэсэн байж болзошгүй зарим сэдвээр УИХ-ын нээлттэй сонсгол зохион байгуулахаар ярьцгаажээ.

Дөрвөн асуудлаар ийм сонсгол хийхээр хөндөж буй юм байна. Үүнд, “Бодь интернэшнл”-ийн оффтейк гэрээ, “Тэрбум мод” үндэсний хөтөлбөр, Газрын тос боловсруулах үйлдвэр, АН-ын алдагдсан тамганы асуудал зэрэг багтжээ. 

Эдгээрээр сонсгол хийхээр нэр бүхий гишүүдийн бланк бүлгийнх нь гишүүдийг “хэсээд” эхэлжээ. Товчхондоо, сөрөг хүчнийхэн төмөр зам, тэрбум мод, нефтийн үйлдвэр, бас намынхаа алга болсон тамганы ардах учрыг “сонсох”-оор болсон байна. 

Б.БАЯР

Эх сурвалж: “Зууны мэдээ” сонин