УИХ-ын гишүүн Э.Болормааг албадан ирүүлэх хүсэлтийг Нийслэлийн прокурорын газраас шүүхэд хүргүүлсэн.

Тэгвэл өнөөдөр УИХ-ын гишүүн Э.Болормаа уг асуудлаар Төрийн ордонд сэтгүүлчдэд мэдээлэл өглөө. 

Тэрбээр "Би өнгөрсөн долоо хоногт Бразил улс руу албан ёсны томилолтоор явсан. Энэ үеэр албадан ирүүлэх гэсэн мэдээллийг цахим орчноос харсан. Эрэн сурвалжилсан зүйл байхгүй. 

Би томилолтоос ирмэгцээ дуудсан газар нь яваад очсон. Шүүхийн захирамж гаргаад тогтоол гардуулна гэсэн боловч цагдаагийн байгууллагад гардуулах тогтоол нь ч байгаагүй. Бэлэн биш байсан. Улс төрийн ямар дарамт шахалт дунд энэ хэд маань ажиллаж байгаа бол гэсэн бодол төрсөн.

Бичиг цаас нь бэлэн болсон үед эргэж очиход нээлттэй. Би өдөр бүр ажил дээр байгаа. 

Хэрэв гаднын хөрөнгө оруулалттай компаниас хандив авсан бол ямар хариуцлагын асуудал яригддагийг судлаад үзээрэй. Нэгт хандив өгсөн компани хуулийн хариуцлага хүлээх ёстой. Нэр дэвшигч болон сонгуулийн штаб дээр хариуцлага байгаа. 

Үүнийг санаатайгаар хийсэн гэж үздэг. Цагдаа дээр гаргасан гомдлыг нь харахад тэр компани хандив өгснийхөө маргааш нь нэрээ өөрчилсөн байна. Хэрэв ийм бол тухайн асуудал хариуцаж байсан сонгуулийн ажилтнуудад торгууль ногдуулдаг хуулийн зохицуулалттай. УИХ-ын гишүүнийг эгүүлэн татах хуулийн зохицуулалт байхгүй.

Цагдаагийн байгууллагад компани, зохион байгуулалттай хийсэн хүмүүсийг шалгаад өгөөч гэсэн хүсэлт тавьсан боловч шалгаагүй. Аливаа нэг гишүүн дээр үүнийг санаатай хийх шиг амархан юм байхгүй. 

Би анх удаа сонгуульд нэр дэвшсэн учраас туршлагатай ах нар шиг хор найруулж мэдэхгүй" гэв. 

Үргэлжлүүлэн сэтгүүлчид түүнээс яагаад ийм байдалд орсон талаар асуухад "Би хэлье гэснээ нууж хаалгүй хэлчихдэг. Төрийн ордонд гэлтгүй аливаа байгууллагад залуу эмэгтэйчүүдийг энэ юугаа мэдэх вэ, миний үгээр байх ёстой гэж дарамталдаг зүйл байдаг. Би бол үүний нэг жишээ. 

Гишүүн болсноос хойш хүмүүс ямар байдаг вэ гэдгийг мэдлээ. Өмнөх УИХ-д байсан нэг эмэгтэй гишүүн эрэгтэй гишүүн Төрийн ордонд ажлын байран дээр бэлгийн дарамт үзүүлснийг ярьж байсан. Энэ асуудлыг тухайн үед УИХ-ын даргадаа очоод ярихад ёс зүйн хариуцлага тооцох бус чимээгүй өнгөрөөчих гэдэг зүйл ярьсан. 

Ийм л байдалтай олон эмэгтэйчүүд ажлын байран дээрээ дарамт мэдэрдэг. Энэ соёлыг өөрчлөх гэж шударга дугарахад олон хүний дургүй хүргэж байгаа байх" гэлээ.