Улаанбаатар хотын захирагч Х.Нямбаатар үе, үеийн Байгаль орчны сайд нар отоглох цэг нэрээр газар олгож, хууль зөрчсөн үйлдлүүдийг удаа дараа гаргасан гэх асуудлыг Нийслэлийн иргэдийн төлөөлөгчдийн хуралдаанд өчигдөр /2025.11.28/ оролцох үеэрээ мэдэгдлээ.

Тэрбээр “Богд уулын аманд байгаа иргэд, Яармагийн иргэд бүгд урцанд амьдардаг. Үе, үеийн Байгаль орчины сайд нар отоглох цэг нэрээр энэ газруудыг олгосон. Цаанаа авлига, ашиг сонирхлын зөрчил 30 жил явсан. Ус дулаанаар хангах, сургууль, цэцэрлэгээр хангах, эмнэлгээр хангах,  зам тавих бүх үүрэг нь хотод ирсэн.  Нэр бүхий компанийн захирлууд Нүхтэд баахан хаус барихдаа замыг нь эвдэж дуусгасан, араас нь татвар төлөгчдийн мөнгөөр Нүхтийн замыг шинэчилж тавьсан.

Шинэ Яармагт боссон бүх орон сууцны хорооллын газрын зөвшөөрлийг Байгаль орчны яамнаас отоглох цэгийн зөвшөөрөл нэрээр авсан байдаг. Орон сууцны хорооллынх нь шугам сүлжээ шаардлага хангадаггүй. Ноднин мөн л нийслэлийн татвар төлөгчдийн мөнгөөр Яармаг орчмын орон сууцны хорооллын ундны усны шугамыг шинэчилсэн. Одоо компаниуд салбар шугамаа шинэчлэх ёстой ч шинэчилдэггүй, оршин суугчид нь нийслэл рүү дайраад л байгаа.

Энэ асуудлыг шийдвэрлэхийн тулд би 2024 оны УИХ-ын чуулган сүүлийн хурлаа хийж байх үед нь нэр бүхий хуульд өөрчлөлт оруулаад Богд уулын хамгаалалтын захиргаанд байгаа газрыг хот руу шилжүүлье гэтэл УИХ-ын Төрийн байгуулалтын байнгын хорооны хуралдаанаар хэлэлцэж байхдаа “Хэлэлцэхгүй” гээд шууд унагаасан.  Өөрөөр хэлбэл, энэний цаана юу байдаг вэ гэхээр Богд уулын аманд маш их авлига ашиг сонирхлын зөрчил, маш их мөнгө угаалтын асуудал байдаг ” гэлээ.

Үнэндээ ч мөнгөтэй, эрх мэдэлтэй нь Улаанбаатар хотын өнгөтэй өөдтэй газар бүрийг уул, уулаар нь хашаалж, иргэд агаарлах ч газаргүй болгосон бол жирийн иргэнд нь  0.07 га газар эзэмших эрх ч олддоггүй. Арайхийн зуслангийн газар эзэмшихээр хашаа хороо бариагүй гээд эрхийг нь цуцалдаг. Гэтэл мөнгөтэй, эрх мэдэлтэй нь отоглох газар байгуулна нэрийн дор газар аваад орон сууцны бүхэл бүтэн хороолол барьж хууль зөрчсөн байхад зөвшөөрлийг нь цуцалдаггүй нь авлига, ашиг сонирхлын асар их зөрчилтэйг дээрх Х.Нямбаатарын мэдэгдлээс тодоос тод харагдаж байна.