Шинэ оны ажлын эхний өдөр Замын-Үүдийн гааль 408000 ш, нэг бүрийн онцгой татвар нь 44000 төгрөгний үнийн дүнтэй архины хуурамч акцийг гаалийн хяналт шалгалтаар илрүүлсэн байна. Энэ нь улсын төсөвт орох 17.9 тэрбум төгрөгний татвар аж.

Гаальд 20000 кг, 12 нэр төрлийн, 4500 ширхэг баглаа боодолтой бараа мэдүүлснээс ганцхан хайрцагт хийсэн дээрх хуурамч акцийг мэргэжлийн өндөр ур чадвараар илрүүлжээ.

ГЕГ-н Зөрчилтэй тэмцэх газрын статистик мэдээгээр зөвхөн Замын-Үүдийн гаалийн газрын Гаалийн улсын байцаагч нар 2025 онд гаалийн хууль тогтоомж зөрчсөн нийт 1630 хэрэг зөрчил илрүүлж, гэмт хэргийн шинжтэй 40 хэргийг прокурорын байгууллага харьяалал тогтоож хууль хяналтын байгууллагад шилжүүлжээ.

Холбогдох хэрэг зөрчилд 2.3 тэрбум төгрөгний торгууль ноогдуулж, 3.3 тэрбум төгрөгний татварыг нөхөн төлүүлж улсын төсөвт нийт 5.6 тэрум төгрөг төвлөрүүлсэн байна.