ХЗДХ-ийн сайд Б.Энхбаярын зүгээс "Гэрэгэ тауэр"-ын 14 давхрыг Л.Оюун-Эрдэнэ, Б.Баатар дээрэмдэж авсан" гэх агуулга бүхий мэдээллийг олон нийтэд анх дэлгэсэн.

Эл мэдээлэлтэй холбоотойгоор  гуравдугаар сарын 13-ны өдөр "Л.Оюун-Эрдэнэ "Гэрэгэ тауэр"-ын 14 давхрыг дээрэмдэхийн тулд Хишигбаяр гэх залууг хориод, эхнэрт нь давхар хэрэг үүсгэсэн. Эхнэр нь МАН-аас жагсаалтаар нэр дэвшсэн н.Нандин-Эрдэнэ гэх эмэгтэй юм билээ" гэх мэдээллийг хэлсэн юм. Тэгвэл эл хэргийн хохирогч гэх иргэн П.Хишигбаярын мэдэгдэл Newsroom сайтад нийтлэгджээ.

Тэрээр "2021 онд Л.Оюун-Эрдэнэ, Б.Баатар нарын "Херо энтертайнмент" компанид "Гэрэгэ тауэр"-ын 14 давхрыг 1 сая ам.доллароор худалдахаар тохирсон боловч нэг ч төгрөг төлөөгүй. 2024 онд Б.Баатартай уулзаж, төлбөрөө төлөхийг шаардахад "Ална шүү бацаан минь. Аятайхан байгаарай" гэж заналхийлсэн. 2025 оны нэгдүгээр сард Л.Оюун-Эрдэнэ, Х.Баатар нар надад хэрэг тохож, 19 хоног цагдан хорьж, "Гэрэгэ тауэр"-ын 14 давхрыг үнэ төлбөргүй шилжүүлж авсан. Ичсэн нүүрэндээ намайг цагдан хоригдож байхад 1.5 тэрбум төгрөгийг манай данс руу хийсэн байсан. "Хонгил"-оор бүрэн чирэгдэж үзлээ. Энэ асуудлаар Б.Баатар, А.Амундра, Л.Оюун-Эрдэнэ нартай уулзахад бэлэн байна" гэжээ.