Улаанбаатар хотын төв талбай дээр урлаг, соёл, спортын арга хэмжээ зохион байгуулж эхлээд буй. Өчигдөр л гэхэд даамын тэмцээн болсон юм.

Энэ сард төв талбай дээр хоолны өдөрлөг, цирк, ширээний теннис, “Playtime pre event” урлагийн арга хэмжээ, зарим яамны нээлттэй хаалганы өдөр нээгдэнэ гэж Нийслэлийн Засаг Даргын Тамгын Газрын хэвлэлийн хэлтсээс мэдээлсэн юм.

Эдгээрээс хоолны өдөрлөгийг иргэд сонирхдог. Өнгөрсөн жил Узбекистан улсаас тогооч нар авчирч монголчуудыг пловоор дайлсан. Ингэхдээ төв талбайд барьсан 4,000 хүний багтаамжтай асарт орохдоо 5,000 төгрөг төлж, узбек тогоочийн бэлтгэсэн хоолыг амталж байв.

Харин энэ жилийн хувьд олон үндэстний хоолны өдөрлөгийг зохион байгуулах юм байна.

Нийслэлийн Аялал Жуулчлалын Газраас тодруулснаар төв талбай дээр хоолны өдөрлөг дөрөвдүгээр сарын 17-26-ны өдрүүдэд болж, Монголын ресторан, зоогийн холбооны гишүүн, дотоодод үйл ажиллагаа явуулдаг 30 орчим ресторан хоолны өдөрлөгт оролцож хятад, солонгос, япон зэрэг ази, мексик, европ хоолыг хийхээр төлөвлөжээ.

Монголын ресторануудын тогоочийн хоолны төрөл, үнэ тарифыг удахгүй тодорхой болгох аж.

Жилийн турш төв талбай дээр зохион байгуулж буй арга хэмжээнд нийслэлийн төсвөөс тодорхой хэмжээний зардал гардаг гэв.

Өнгөрсөн жил долоон өдрийн хөтөлбөртэй хоолны өдөрлөгт нийслэлээс нийт 600 гаруй сая төгрөгийн зардал гарчээ.