Засгийн газрын ээлжит хуралдаанаас гаргасан шийдвэрийг танилцууллаа. 

Энэ үеэр "Төрийн нууцтай холбоотой байсан зарим мэдээллийг ил болгосон" талаар Засгийн газрын Хэрэг эрхлэх газрын дарга Б.Энхбаяр дараах мэдээллийг хүргэлээ. 

Тэрбээр "2021 оны зургаадугаар сарын 23-ны өдрийн MN04 тоот маш нууцын зэрэглэлд байсан Монгол Улсын үндэсний аюулгүй байдлын зөвлөмжийг улсын нууцаас гаргалаа.

Энэ зөвлөмж нь Богдхан төмөр замын төсөл дээр "Бодь интернэшнл" компанитай төрийн нууцад авах байдлаар шууд гэрээ байгуулж, нүүрсний офтэйк гэрээ хийсэн. Ийм үндэсний аюулгүй байдлын зөвлөмж болон түүнтэй холбоотой 2021 оны долдугаар сарын 7-ны өдөр, 2021 оны арваннэгдүгээр сард гарсан маш нууцын зэрэглэлтэй байсан Засгийн газрын хоёр тогтоолын төслийг улсын нууцаас гаргалаа. Үүнийг одоо олон нийтэд нээлттэй болгоно" гэв. 

 

Хөнгөн цагааны аж үйлдвэрийн парк Сүхбаатар аймгийн Эрдэнэцагаан суманд байгуулах ажлын явцын талаар танилцуулгыг өнөөдөр Засгийн газрын хуралдаан дээр сонссон байна.

Уг төсөл нь Оюутолгойгоос том хэмжээний төсөлд тооцогдоно гэдгийг Аж үйлдвэр, эрдэс баялгийн сайд Г.Дамдинням онцлов. Төслийн газрыг тусгай хэрэгцээнд авах үүрэг чиглэлийг Ерөнхий сайд өгөөд байгаа ба хөрөнгө оруулагч талтай хэлэлцээр нь идэвхтэй үргэлжилж байгаа юм байна. 

Мөн дотооддоо гангын хэрэгцээгээ бүрэн хангаж, өндөр чанарын ганг бусад улс руу экспортлох хүчин чадалтай гангийн үйлдвэрийн бүтээн байгуулалт Дархан-Уул аймагт хийгдэж байгаа юм. Уг ажлын олон улсын нээлттэй сонгон шалгаруулалт дууссан бөгөөд материалаа ирүүлсэн оролцогчдыг үнэлэх ажлын хэсэг байгуулагдаж байгаа юм байна. Дархан-Уул аймгийн ИТХ 650 га газрыг улсын тусгай хэрэгцээнд авах саналыг дэмжээд байгаа аж. 
Тэсрэх дэлбэрэх бодисын эргэлттэй холбоотой Засгийн газрын тогтоол өнөөдөр батлагджээ. Уул уурхайн үндсэн тэсэлгээний ажлын материал болох тэсрэх дэлбэрэх бодисыг импорт хийдэг боомтуудыг нэмэгдүүлэх, орж ирсэн бодисын хадгалалт хамгаалалт, гаалийн бүрдүүлэлтийг шуурхайлах чиглэлийн үүрэг даалгаврыг өгсөн байна.