Өнөөдрийн байдлаар ам.долларын ханш монголбанкны зарласан ханш 1867 төгрөг, арилжааны банкуудад 1879-1880 төгрөгийн ханштай байна. Өчигдрийн байдлаар ам.долларын ханш 10 төгрөгөөр нэмэгдсэн. Ганцхан өдрийн дотор нэмэгдэж буй нь энэ. Гэхдээ өнөөдөр яагаад ам.долларын ханш өсөөд байна, Ерөнхий сайд Н.Алтанхуягийн амлалт яасан бэ? та долларын ханшийг 1384 төгрөгт барина гэсэн үлгэр боллоо гэж ярихыг хүссэнгүй ээ. Амьдралд бодитоор ард иргэдийн саналтай нэгэн зүйлийн талаар өгүүлэхийг зорьлоо.

Тодруулбал, Монголдоо хамгийн их гишүүдтэй албан ёсны нэгэн цахим хаяг бий. Энэ бол Sweet Kitchen буюу бүтээлч бүсгүйчүүдийн групп. Өчигдөр орой буюу энэ сарын 29-нд нэгэн хэрэглэгч дараах зургийг "Юмны үнэ өсчихөөд байгаа гэнэ. Гэхдээ л монголоос л хямдхан байна. Үүн дээр нэмээд 4 ширхэг зайрмаг авсан нийт 20 гаруй мянган төгрөгөөр авлаа" хэмээн постолсон юм.

Уншигч та бүхэн хүний пост бидэнд ямар хамаатай гэж бодож магадгүй. Үгүй шүү тэгж болохгүй. Энэ хэрэглэгч Чехэд түр амьдарч байгаа гэнэ. Тэгээд монголоос очоод дэлгүүрээс худалдан авалт хийхэд үнэхээр их гутарсан байна. Үүнийгээ тэрбээр монголд хүнсний бүтээгдэхүүн ямар их үнэтэй байгаад.

Энэхүү байдлаас харахад манай улс гадаад валютаас шууд хамааралтай болсноос үүдэн бараа бүтээгдэхүүний үнэ үргэлж л нэмэгдэж байдгийн тод жишээ. Түүний эл постыг харсан тус группын гишүүд "Монголд 20 мянгаар ийм их зүйл худалдаж авдаг болчихвол ч сайхан даа. Үүнийг бараг эндээс 50-70 мянгаар худалдаж авах байх. Тэр бананыг авахад 20 мянган төгрөг давна. Өнөөдөр 2кг тахианы мах 24 мянган төгрөг, банана, зайдас, чихэр, өөр ганц хоёр зүйл "Оргил" худалдааны төвөөс авахад 119 мянган төгрөг болсон" гэж өөрсдийн сэтгэгдлээ үлдээжээ.

Уг постын гол зорилго нь иймэрхүү хүнсээ ийм бага үнээр монголдоо авчмаар байгаа гэдгийг тэрбээр дуулгасан юм. Аргагүй дээ. Хэдүүлээ нэгэн жишээ авч тоо бодьё.

Нэгэн худалдааны төвөөс талх 1100, ариун цэврийн цаас 910, кофены сүү 6800, кофе 4230, төмс 1 кг 1400, сонгино 500 гр 750, дээд гурил савласан 1 кг 2450, үхрийн цул мах 1кг 11000, сүү 1 л 1950, тараг 1 л 2000, ургамлын тос 3500, өндөг 10 ширхэг нэг бүрийн үнэ нь 360 төгрөгөөр худалдаж авахад 39,690 төгрөгөөр авч байна. Хамгийн хямдхан гэгддэг дэлгүүрээс авахад шүү дээ.

Мөн нэгэн хэрэглэгч 4 еврогоор дараах жимсийг худалдаж авсан гэв. Манайд бол бараг л үнэ банана 20 мянган төгрөг болно хэмээн гэрийн эзэгтэй нар халаглаж сууна.

Манай улсад хөдөлмөрийн хөлсний доод хэмжээ 192 мянган төгрөг. Энэ хэмжээ нь олон улсын стандартаас харьцангуй доогуур үнэлэмж. Монголоос өөр бага цалинтай хэрнээ өндөр үнээр бараа, бүтээгдэхүүнээ худалдаж авдаг орон байхгүй гэхэд хилсдэхгүй.

Х.Даваа