“Далайн хаадууд” клуб 15 жилийн ойн хүрээндээ олон улсын нээлттэй усан спортын “Blue Mongolia Buir 2026” фестивалийг анх удаа Монголд зохион байгуулах гэж байна.

Тэмцээнийг зохион байгуулагч Б.Ангараг "Монголд анх удаа болох задгай усанд сэлэлтийн тэмцээнд 10 орны 100 гаруй тамирчин өрсөлдөхөөр мэдүүлэг өгсөн.

Одоогоор Япон, АНУ, Тайланд, Турк, Хятад, Орос, Иран зэрэг улсуудаас тамирчид ирэхээр төлөвлөж байна. Мөн Монголын тамирчид өрсөлдөхөөр бэлтгэлдээ гарсан. Гурван өдрийн турш өрсөлдөх тэмцээнийхээ хөтөлбөр төлөвлөгөөг бид гаргаж байгаа. Өсвөр үе, ахмад, насанд хүрэгчид гэсэн насны ангиллаар задгай усанд сэлэлтийн тэмцээнийг зохион байгуулах стандарт дүрмийн дагуу эх орондоо анх удаа мэргэжлийн байгууллагуудтай хамтран зохион байгуулна. 

Тэмцээнд урьсан тамирчид маань олон улсад зэрэглэл өндөртэй, тив, дэлхий, олимпын аваргууд ирнэ. Үүний нэг нь бидний сайн мэдэх PHYSICAL: ASIA 100 шоунд Япон улсын багийг ахалж оролцсон тамирчин байгаа. Одоогоор бид нэрийг нь нууцалж байна" гэв.

Тус фестиваль энэ сарын 28-30-ны хооронд Дорнод аймгийн Буйр нуурт болох юм. Мөн энэ үеэр 200-10.000 метрийн усан сэлэлтийн олон улсын нээлттэй тэмцээн, гэр бүлийн “Хөгжөөнт нугас” уралдаан, Beach Festival, оройн концерт, DJ шоу, галт шоу болон үндэсний урлагийн тоглолтууд болох ажээ.

Фестивальд тамирчдаас гадна иргэд очиж гэр бүлээрээ уралдаант, хөгжөөнт тэмцээнд оролцон цагийг хөгжилтэй өнгөрүүлэх боломжтой. Түүнчлэн тэмцээний оролцогч, аялагчдад зориулж зургаадугаар сарын 26-нд Дүнжингарав худалдааны төвөөс автобус нэг удаа явах юм байна.