УИХ-ын гишүүн, Гэр бүл, хөдөлмөр, нийгмийн хамгааллын сайд Т.Аубакир сэтгүүлчдэд мэдээлэл хийх үеэрээ УИХ-ын гишүүн М.Нарантуяа-Нара түүнийг бодлогын яам удирдах ёсгүй гэж Ерөнхий сайдад хэлсэнтэй холбоотой байр сууриа илэрхийлэв.

Тодруулбал тэрээр: "Монголын парламентад харамсалтай үйл явдал болоод байна. Дэлхийн улс үндэстнүүд жигшин зэвүүцдэг, ялгаварлан гадуурхсан, фашист үйлдлийг Улсын Их Хурлын гишүүн хийж байгаад маш их харамсаж байна. Энэ асуудал дээр хуулийн байгууллага ажиллаж байгаа.

Манай аймгаас сонгогдсон дөрвөн гишүүн хандах газарт нь хандсан. Цаашид хэрхэн шийдэх нь хуулийн байгууллагын асуудал.

Хэдэн хүний нэр дурьдсаныг би харсан. Зарим хүнийг нь хаана байдаг, ямар ажил хийдгийг нь би сайн мэдэхгүй ээ. Тэдгээр хүмүүсээр дамжуулж Монгол Улсад амьдарч байгаа маш олон залуучууд, хүүхдүүдийг гутаан доромжилж байна. Тийм учраас арга хэмжээ авах байгууллагууд нь авах байх." гэсэн юм.