Дээрхийн гэгээн авралт богд Тижан Чогбрүл Ринбучэ нь Монголын лам хувраг, сүм хийдүүд, сүсэгтэн олны заллагаар морилон ирж, Улаанбаатар хотод энэ сарын 11-12-ны өдрүүдэд Монголын Үндэсний АСА циркт “Ямандаг бурхан болон Дорж Шүгдэн сахиусны амин авшиг” айлдлаа.

Чин Вангийн хүрээ буюу Булган аймгийн Дашчойнхорлин хийдэд  тус хийд болон нутгийн олны хүсэлтээр энэ сарын 13-14-ний өдрүүдэд залран Гонбу Шалши сахиусны даган соёрхолыг хайрлаж, XIII Далай ламын Монгол багш хэмээн алдаршсан Чин Вангийн Шаддүвдандар аграмбын хойд дүрийг ширээнд залах ёслолд оролцож, шинэ хувилгаанд Еший Чэнбий Ванчүг буюу Билгүүн, Эрдмийн Эрх баялаг хэмээх нэр соёрхжээ. XIII Далай ламын багшийн хойд дүрийг ширээнд залах ёслолд XIV Далай ламын Ёнзин багшийн хойд дүр морилон оролцсон нутгийн сүсэгтэн олны удаан жилийн хүсэл биелсэн, их бэлэг дэмбэрэлтэй сайхан үйл явдал боллоо.

Өндөр гэгээний хийд хэмээн алдаршсан Амарбаясгалант хийдэд энэ сарын 14-16-ны өдрүүдэд морилж, хийдийн лам хуврагууд Богд Ринбучэ-д бат оршил буюу даншиг мандал өргөжээ. Тус хийдийн Түнлха буюу Дөрөвдүгээр Богдын номын их сахиус Дорж Шүгдэн бээр хувраг гэлэн Лувсанчойдогийг Дөрөвдүгээр Богдын таалалын эрхэм шавь олноо Жидорын хамба лам хэмээн алдаршсан Их хүрээний Хамба номун хан Агваанхайдүвын гуравдугаар дүрийн хувилгаанаар тодруулан айлдсан бөгөөд энэхүү хувилгааныг ширээнд залах ёслолд оролцож, шинэ хувилгаанд Еший Чойжи Ванчүг буюу Билгүүн, Номын Эрх баялаг хэмээн нэр соёрхжээ.

Өнөөдөр Төгс Баясгалант Эмэгтэйчүүдийн хийд болон Чойжин ламын сүм музейд морилсоноор Богд ринбучэн Монгол орон дахь айлчлал өндөрлөж байгаа бөгөөд лам хувраг, сүсэгтэн олонд уламжлал ёс заншил, шашин шүтлэгээ хадгалах, эрдэм боловсрол, эв нэгдлийг хичээх нь эрхэм чухал болох тухай онцлон айлдаж, улс орондоо ихийг хийж бүтээсэн, бусдад тусласан, зөв сайн хүн байхыг дахин дахин захиж байлаа.

Богд ринбучэ-н Наймдугаар Богдын дүү Чойжин лам Лувсанхайдүвын сүмээр морилох шалтгаанаа айлдахдаа:

Энэ хийдэд Монголын төрийн болон богд нарын их сахиус болох шарын шашны их сахиус Дорж Шүгдэн залаатай байдаг. Дөрөвдүгээр Богд болон Наймдугаар Далай лам нар ах дүү бөгөөд Лхалү хэмээх түвдийн эртний сурвалжит удмын хүмүүс юм. Монгол орноо Дөрөвдүгээр богдоос эхлэн Дорж Шүгдэн сахиусны шүтлэг, тахилга их дэлгэрсэн бөгөөд дараа дараагийн богд нар болон монголын олон лам дээдэс нар энэ сахиусыг шүтэж, ном зохиол туурвиж байсан. Анх Монголын алдарт эрдэмтэн лам Зава Дамдин энэхүү сахиусны Бэүвүм буюу бүх уншлага, номыг эмхэтгэжээ. Монголын олон хийд дацангийн шүтээн байсан юм. Лхалү удмынхан эртнээс Дорж Шүгдэн сахиусыг шүтдэг бөгөөд миний бие болон урд дүрийн Тижан богдын шавь, өглөгийн эзэн тул бид нэгэн сахиустай, багш шавийн холбоотой хүмүүс билээ.

Ийнхүү XIV Далай ламын Ёнзин багш Тижан богдын хойд дүр, Дээрхийн гэгээн авралт богд Тижан Чогбрүл ринбучэ-н айлчлал шашин номын их хур буусан сайхан үйл явдлаар дүүрэн боллоо.