Гэр бүлийн хүчирхийлэл далд хэлбэрээр үйлдэгддэг бөгөөд үүний улмаас эмэгтэйчүүд, хүүхдүүдийн амьдралд арилашгүй хар толбо үлддэг. Тэгвэл гэр бүлийн хүчирхийлэлийн золиос болсон бүсгүй хүүхэдтэйгээ уулзаж, утсаар ярьж чадахгүй байгаа ажээ.  Тэрбээр хүний эрхийн болон цагдаагийн байгууллагад ханддаг ч түүний өргөдлийг хүлээн авсан ч эрүүгийн хэрэг үүсгэн шалгахаас татгалздаг байна.

Тодруулбал, Монгол улсын иргэн О.Н болон М.Х нар гэр бүл болж, 2010 оны 11-р сард  хүүтэй болсон байна.  Өнгөрсөн хугацаанд  О.Н нь эхнэрээ байнгын  бэлгийн болон  сэтгэл санааны дарамтад оруулж  байсан ажээ.  Гаж байдлаар өдөр бүр бэлгийн ажил хийхийг шаарддаг байсан гэнэ.  Үүгээр ч зогсохгүй  гэр бүлээсээ гадуур замбараагүй бэлгийн явдалтай байсан бөгөөд эхнэртээ бэлгийн замын халдварт өвчин халдааж байсан гэдэг. Мөн О.Н нь  эр хүн сонирхдог, хүүгийнхээ бэлгэ эрхтэнг байнга шахам “оролддог” байсан болохоор  эхнэр М.Х нь салах өргөдлөө шүүхийн байгууллагад хандсан ажээ.

Шүүхээс хүүхдийг эцэг, эхийнх нь хэний асрамжид үлдээх эсэхийг шийдэхийн тулд шинжээчийн дүгнэлтийг гаргуулсан байдаг ч тэрхүү шинжээчийн дүгнэлт нь учир дутагдалтай байсан гэдгийг бид өмнө нь мэдээлсэн.  /Дэлгэрэнгүйг унших холбоос http://news.dorgio.mn/society/sejigtei/17880/

О.Н-г гаж донтой гэдгийг тогтоолгохоор М.Х нь Сүхбаатар дүүргийн цагдаагийн газарт хандсан байдаг. Энэхүү өргөдлийн дагуу эрүүгийн хэрэг үүсгэн шалгах ёстой байтал прокуророос энэ хэргийг шалгалгүй хаа хэмээн үүрэг болгосон байдаг. Тиймээс энэ хэргийг шалгах ёстой хэмээн үзэж  М.Х болон түүний өмгөөлөгч Г.Батбаяр нар дээд шатны байгууллагад нь шалгуулахаар хандаад байгаа ажээ.

2013 оны 11-р сард шүүхэд хандснаас хойш М.Х буюу хүүхдийн ээж хүүтэйгээ цөөн уулзаж, утсаар ярьсан байна. Хүүхэдтэйгээ уулзах гэхээр уулзуулахгүй, ярих гэхээр яриулдаггүй тул М.Х аргаа барахдаа хүүгээ  авч Дархан руу зугтсан байна.  Улмаар битүү хатгалгаа болсон хүүгээ эмчлүүлж байхад нь хүүгийн аав, өвөө  нь 5-6 залуу дагуулан очиж хүүгийнх дэргэд ээжийг нь зодож танхайрсан хэрэг гарсан юм.  Энэ хэрэгт цагдаагийн байгууллага эрүүгийн хэрэг үүсгэх бус захиргааны хариуцлага тооцуулсан байна.  

Өнөөдөр гурван настай Н.Д хүү аав дээрээ байгаа бөгөөд аав нь архи ууж, агсам болж байгаа гэнэ.  Үүгээр ч зогсохгүй гурван настай Н.Д-т архи уулгасан байна.  Энэ талаар хүү ээжтэйгээ утсаар ярихдаа хэлсэн байдаг.  

О.Н нь хөрөнгөө эхнэр, хүүхэдтэйгээ хуваахгүй гэж хоёр өрөө байраа ээжийнхээ нэр дээр, засварын газраа ахынхаа нэр дээр шилжүүлсэн байдаг. Харин Хүүхдийн төлөө үндэсний газартай гэрээтэй ажилладаг шинжээчийн дүгнэлт гаргадаг газрынханд  бүхий л хөрөнгөө мэдүүлсэн байдаг.  Өөрөөр хэлбэл хүүхдийг авах гэж хөрөнгөө үнэн мэдүүлж, маргааш болох шүүх хурлаас өмнө хөрөнгөө бусдын нэр дээр шилжүүлсэн байгаа юм. Н.Д хүүгийн ээж М.Х-ийн сарын орлого  эцгээс нь дутахааргүй бөгөөд өөрийн гэсэн орон байртай ажээ.  

Монгол улсын шүүхийн практикт бага насны хүүхдийг ээжид нь өгдөг. Тэгтэл  өнгөрсөн оны 11-р сараас хойш  шүүх  дээр шийдэгдээгүй энэ хэргээс болж өнөөдөр бага насны хүүхэд  ээжтэйгээ ч уулзаж чадахгүй,  аавтайгаа хамт амьдарч байгаа юм.
Хүүхдийн төлөө үндэсний газар, хүний эрхийн байгууллага, цагдаа, прокурор яагаад энэ хэрэгт хайнга хандаж байна вэ?  

Маргааш болох шүүх хурлаар хүүхдийг ээжид нь өгөх үү? Архи уудаг, хүчирхийлэгч, гаж донтонд хүүг нь өгөх үү  гэдгийг харах л үлдлээ...  

А.Баярмаа