Шинэ залуу уран бүтээлч А.Шинэтулгыг уншигчиддаа товчхон танилцуулж, анхны тодотголтой шинэхэн уран бүтээлийнх нь клипийг хүргэж байна.

Дуучны хувьд, “Universe Best Songs-2012” наадмын шилдэг оролцогч гэдгээрээ үзэгчдэд анх танигдсан бөгөөд мэргэжлийн дуучин болохоор Соёл Урлагийн Их Сургуульд суралцаж яваа ажээ. Цаашид поп чиглэлээр дуулах бөгөөд чанартай уран бүтээлүүд гаргаж, олон жил үргэлжлэх дуучны карьер үүсгэхээр ийнхүү анхны уран бүтээлийн гараагаа амжилттай эхлүүллээ.

Залуу дуучин А.Шинэтулгын шинэ уран бүтээлийн эхлэл болж буй “Alone” буюу “Чамгүйгээр” дууны аяыг хөгжмийн зохиолч, продюсер  Оки зохиож, үгийг нь реппер Quiza бичжээ. Харин дууны бичлэг “Нэгүн” студид хийгдэж, клипийг найруулагч Б.Чингүүний “Aurora” энтертайнмэнтийнхэн хийж гүйцэтгэжээ.

Клипэнд, аз жаргалтай нэгэн хосын хайр дурлалын түүхийг харуулах хэдий ч хайртай хүнээсээ үлдэн хоцорч, он цаг хугацааг орь ганцаараа өнгөрүүлж байгаа нэгэн залуугийн тухай гарах ажээ. Элдэв чамирхалгүй энгийн хийцтэй клип бүтсэн ч залуу уран бүтээлчийн дуулсан анхны уран бүтээлийн аялгуу, дуу хоолой хөгжим сонирхогчдод таалагдана гэдэгт итгэлтэй байна.