“ТВ Коктейль” хамтлагийн цоглог, эрч хүчтэй залуус дөрөв дэх дэлгэцийн бүтээлээ үзэгчиддээ толилуулж эхэллээ.

“Омарын эрэлд” нэртэй адал явдалт, инээдмийн уран сайхны кино энэ сарын 6-ны өдөр нээлтээ хийж "Тэнгис", "Өргөө", "Соёмбо" кино театруудын дэлгэцнээ гарч байгааг дуулгахад таатай байна. 

Киноны нээлтийн үеэр шагналын хур бууж, “ТВ Коктейль” хамтлагийн жүжигчид Э.Цолмонбаяр , А.Өнөржаргал, Д.Энхбаяр нар СТА цол тэмдгээр энгэрээ мялаалгав. Мөн жүжигчин Р.Адъяа СТА цол тэмдгээр шагнуулсан юм. 

"Омарын эрэлд" киноны зохиолыг “ТВ Коктейль” хамтлагийн жүжигчин Д.Энхбаяр бичсэн бол ерөнхий найруулагчаар “Мөрөөдлийн хөлөг онгоц”, “Бодлын хулгайч”, “Ларьдма”, “Үргээлэг” зэрэг үзэгчдийг байлдан дагуулсан бүтээлийг найруулсан найруулагч Ж.Сэнгэдорж ажиллажээ. Продюссероор С.Жавхлан, Э.Цолмонбаяр зураглаачаар “Логик” фильм студийн Э.Нэргүй, хөгжмийн зохиолчоор “Ертөнц” цомгийн зохиолч Г.Онон нар ажиллажээ.

Киноны гол дүрд “ТВ Коктейль” хамтлагийн залуус бүрэн бүрэлдэхүүнээрээ тоглосон бөгөөд жүжигчин Б.Навчаа, Д.Дэлгэрсайхан, Б.Баатархүү, Х.Манлайбаатар, Р.Адъяа  нар оролцон тоглосон.

Ингээд та бүхэндээ “Омарын эрэлд” уран сайхны киноны нээлтийн үйл ажиллагааны фотог сонирхуулья.

Д.Ана