“Гэгээн муза”академиас жил бүр санаачлан уламжлал болгон зохион байгуулдаг драмын шилдэг уран бүтээлчдийг тодруулдаг энэ удаагийн “Гэгээн муза-12” олон улсын наадам ирэх 5 дугаар сарын 17-23-ны өдрүүдэд зохион байгуулагдах гэж байна. Энэ талаар МУГЖ С.Сарантуяатай ярилцлаа.  

-“Гэгээн муза” наадам жилээс жилд хүрээгээ тэлсээр байна. Тиймээс энэ жилийн хувьд урьдынхаас илүү бүтэц бүрэлдэхүүнтэйгээр  оролцох гэж байна  уу?

-Өнгөрсөн жилүүдтэй харьцуулаахад энэ жил гаднаас  ирж оролцох уран бүтээлчдийн тоо  нэмэгдсэн. Өөрөөр хэлбэл манайхтай нийлээд нийт есөн орон оролцох юм. Тухайлбал ОХУ-ын Буриад улсаас нийт 30 хүний бүрэлдэхүүнтэй ирж байхад эндээс найман уран бүтээлч  эрхээ аваад оролцож байх жишээтэй. Мөн Өвөрмонголоос 40 гаруй уран бүтээлч, харин нэг хүний жүжгийн төрөл болоод ирэхээр хүний тоо багасаад ирдэг юм. Тэгэхээр нийтэд нь аваад үзвэл 100 гаруй уран бүтээлч болоод  явчихаж байгаа юм. Эндээс  нэр дэвшсэн 62 уран бүтээлч үндсэн номинац дээрээ өрсөлдөнө. Нэг хүний жүжгийн төрөл дээр мэргэжлийн шүүгч болох Герман улсаас зохиолч, найруулагч  Нина Мазурыг авчирсан байгаа.   

-Энэ жилийн  наадмын онцлог юу вэ?

-Бид өнгөрсөн оны 11 дүгээр сард Армен улсад болсон Олон улсын Театрын Институтын 34 дүгээр  их хуралд төлөөлөгчөөр оролцож тэр үеэрээ “Гэгээн муза” наадмынхаа үйл ажиллагааг танилцуулж, албан ёсоор Монголын “Гэгээн муза” наадам олон улсын наадам мөн гэдгийг баталгаажуулж ирсэн сайхан амжилтаар наадмаа угтах гэж байна. Энэ удаа бидэнтэй  Нийслэлийн засаг даргын Тамгын газар,БСШУЯ, Хүүхдийн төлөө үндэсний газар, зэрэг байгууллагууд хамтран ажиллаж байгаа. Энэхүү өндөр нэр хүндийг авчирч байгаа нь монголын театрын хөгжил, уран бүтээлчдийн ур чадварын түвшин ямар байна вэ гэдгийг өөрийн орондоо ирсэн гадны уран бүтээлчдэд сурталчлан таниулж байна гэсэн үг. Ингэж   зөвхөн театрын хөгжлийг танилцуулаад зогсохгүй нийслэл хотоо сурталчлах өргөн боломж нээгдэж байгаагаараа ач холбогдолтой юм.

- Наадмын хүрээнд бусад ямар ажлууд зохион байгуулагдах вэ?

-“Гэр” театрын нээлт болно. Энэ үеэр “Нэг хүний жүжигт найруулах жүжиглэх арга ажиллагаа, хандах хандлага”, “Нэг хүний жүжгийг хэрхэн бичих вэ” зэрэг хоёр сургалт явуулж байгаа . Уран бүтээлчдээ мэргэшүүлэх зорилгоор энэ сургалтыг  явуулж байгаа юм. Нэгдүгээр шатанд нийт 49 бүтээл ирснээс 21 бүтээл орохоор нэр дэвшсэн.

-Уран бүтээлчдийг олон улсад сурталчлах тал дээр ямар ажлууд  хийгдэж байна вэ?

-Манай “Гэгээн муза” академийн үндсэн үйл ажиллагаа мэргэжлийн уран бүтээлчдэд чиглэгддэг. Тийм учраас театрын бүтээл маш өргөн цар хүрээтэй байдаг. Баг бүрэлдэхүүн, жүжгийн тайз хувцас гээд олон зүйл шаарддаг учраас  тэр болгон  гадагшаа явж чаддаггүй. Тийм учраас бид энэ цаг үед олон улсын түвшинд өндөр байр суурь эзэлж байгаа нэг хүний жүжгийг монголдоо хөгжүүлэх талаар нэлээд анхаарч эхэлж байна.Үүний үр дүнд гадны наадмуудад манай уран бүтээлчдээс явж байгаа. Энэ нь монголын хувь уран бүтээлчээс гадна монгол  гэдэг нэр гадны наадмуудад оролцож байгаагаар цар хүрээ нь харагдах байх аа гэж бодож байна.

Д.Нэргүй