Манай улсын эдийн засаг хүндэрч,  үүнийг дагаад иргэд зээлээ төлж чадахгүй байдалд хүрсэн байна.  Үүнийг  дараах тоон судалгаа харуулж байна.   

Монгол Улсын нэгдсэн төсвийн 2015 оны 2 дугаар улирлын гүйцэтгэлийн мэдээгээр тэнцвэржүүлсэн нийт орлогын бүрдүүлэлт 84.1 хувийн, нийт зарлага 72.3 хувийн гүйцэтгэлтэй, төсвийн нийт тэнцэл 534.9 тэрбум төгрөгийн алдагдалтай гарч, төлөвлөсөн дүнтэй харьцуулахад 716.3 тэрбум төгрөгөөр бага гарлаа. Нэгдсэн төсвийн орлогын төлөвлөгөөний гүйцэтгэлийг орлогын төрлөөр авч үзвэл, Монгол Улсын нэгдсэн төсвийн тэнцвэржүүлсэн нийт орлого татварын орлогоор 88.7 хувь, татварын бус орлогоор 11.3 хувь тус тус бүрдсэн үзүүлэлттэй байна.

 Харин  иргэдийн зээлийн өрийн үлдэгдэл 2015 оны эхний 2 улирлын байдлаар өмнөх оны мөн үетэй харьцуулахад 2.9 хувь буюу 354.3 тэрбум төгрөгөөр өсч, 11.9 их наяд төгрөг боллоо. Гэвч зээлийн өрийн үлдэгдэл нь өнгөрсөн сартай харьцуулахад 1.8 хувиар буурсан байна. Зээл олголт ийнхүү буурахад хугацаа хэтэрсэн зээл өмнөх оны мөн үеэс 38 хувь, чанаргүй зээлийн хэмжээ 36.5 хувиар өсч, хэвийн зээл 6.4 хувиар буурсан нь тус тус нөлөөлсөн байна. Нийт зээлийн өрийн үлдэгдлийг бүтцээр нь авч үзвэл хэвийн зээл 88.5 хувь, хугацаа хэтэрсэн зээл 5.0 хувь, чанаргүй зээл 6.5 хувийг тус тус бүрдүүлж байна. Чанаргүй зээлийн хэмжээ сүүлийн саруудад нэмэгдэж, энэ оны эхний 2 улирлын байдлаар 773.9 тэрбум төгрөгт хүрч, нийт зээлийн өрийн үлдэгдэлд эзлэх хувь 6.5 болсон нь иргэдийн эзэмшиж буй чанаргүй зээлийн хэмжээ өмнхө оны мөн үетэй харьцуулахад 2 дахин өссөн, мөн хувийн хэвшлийн чанаргүй зээлийн хэмжээ 30 орчим хувиар өссөнтэй холбоотой байна.

Тэгвэл чанаргүй  зээлийн статистикийг  ҮСХ зурагласан байх юм.    

Өнөөдөр Монгол улсын засгийн газрын гадаад өр 9,914,533,609,796.12 төгрөг, дотоод өр 3,768,407,835,368.61 болоод байгаа бөгөөд нийт өрийн хэмжээ 13,682,941,445,164.70 төгрөг болоод байна. Энэ нь манай улсын эдийн засаг улам уруудаж байгааг гэрчилж байгаа юм. Уг нь хаана хаанаа бодолцоод, амралтаа, улс төржилтөө болиод ажлаа хийвэл улс орон ингэж таргтагтаа тулахгүй л байх. Хэн хэн нь бодох л асуудал...

А.Баярмаа