Цахим орчинд Chinggis Unur нэртэй фэйсбүүк хэрэглэгч “хүний наймаачин”, “гаж донтон” гэгдэж, цахим гэмт хэрэгтэй тэмцэх газар шалгуулахаар охид бүсгүйчүүд нэгдэж байгаа талаар мэдээлэл цацагдаад буй. 

Бид баасан гарагт Ч.Өнөртүвшинтэй холбогдож, өөрөөс нь тодруулахад “Ийм муухай нэр зүүчихээд байгаагаа шалгуулмаар байна. Хамтран ажиллах санал тавьсныхаа хариуд нэр төрөө сэвтээлээ. Сурталчилгааны саналыг өөрийг нь өдөж, хоргоож буй мэтээр ойлгож буй охид, бүсгүйчүүдийн сэтгэхүйд харамсаж байна” хэмээж байв. 

Харин өчигдөр Ж.Отгонбаяр мөн бидэнтэй холбогдон, мэдээлэл өгөхийг хүссэн юм.  Тэрбээр “2003 онд хэсэг Солонгосчууд ирж, 20 нас хүрээгүй монгол охидыг үндэсний хувцас өмсгөн зургийг нь авах нэрийдлээр гэрээ хийсэн байдаг. Мөнгө амлан, гэрээ хийж, гурван өдрөөр хөдөө авч яваад зураг авалтын үеэр нүцгэнээр, биеийг нь спиртээр арчин зураг авсан. Ингэхдээ хөндлөнгийн камераар ёс бус зураг дарж, охидын нэр төрд халдсан маш том хэрэг одоо ч цахим орчинд хуучраагүй байна. Эдгээр зургийг Ч.Өнөртүвшин дарсан юм. Тэдгээр охид энэ зурагнаас болж, гэр бүлээсээ салах, найз нөхдөөсөө ганцаардах, хувийн карьерт нь нөлөөлөх гээд маш их дарамттай явдаг. 

Залуу охидын мөрөөдөл дээр тоглолт хийж, өрөөндөө дуудаж, хаалгаа цоожлоод хоёулахнаа үлдэж, зураг дардаг. Улмаар хөх, бөгсөнд нь хүрэх зэргээр элдвээр аягладаг гэсэн мэдээлэл надад маш их ирсэн. Надад маш олон охидоос баримт ирсэн тул энэ хүнийг Цахим гэмт хэрэгтэй тэмцэх газар шалгуулах болно. 

Нэмж хэлэхэд хоёр жилийн өмнө Чингэлтэй дүүрэг дээр яг энэ хэргээрээ мөрдөгдөж байсан хүн. 2003 онд хэрэг үүсэж эмэгтэйчүүдийн тэр зурагнаас болж шалгагдаж байсан. Тухайн үед хүний нэр төрд халдсан тухай хууль байгаагүй. Зүйл заалт нь ч байгаагүй.  2007 онд шинэ хууль гарч, хүний нэр хүндийг их дээдлэх олон хуультай болсон. Энэ этгээдийн дарсан шалдан нүцгэн зураг хэзээ нэгэн цагт цахим хуудсаар цацагдаад олон зуун охидын нэр хүндийн асуудал хөндөгдөх вий гэхээс л би маш их айж байна. Над руу залгаад “Чи миний бөгсийг ухаад байвал ална шүү” гэсэн. Гэмгүй хүн тэгж ярихгүй л байх. Даяар Монгол хөдөлгөөн хүртэл энэ залуугийг талаар мэдээлэл надаас нэхэх болсон гэхдээ би тэд нарт өгөхгүй хуулийн байгууллагаар нь явна.

Эцэст нь чи өөрийн гэм нүглээ нууж дарж болно. Чиний гомдоосон олон охин бидэнтэй холбогдож байгаа гэдгийг хэлмээр байна. Бүүр сүүлд нь “Охидуудаа, иймэрхүү хүмүүс олон байдаг. Ямар нэгэн байдлаар сэтгэл санаагаараа хохирсон эмэгтэйчүүд байвал заавал холбогдоорой” гэж хэлмээр байна. Ийм төрлийн хохирогчид ихэвчлэн айж эмээдгээс нууцалдаг. Гэхдээ зориг гаргаад холбогдоорой мэдээллийг тань нууцлах болно”

Б.Оюун 

http://time.mn/