Төмрийн хүдэр сүүлийн долоон жилийн доод түвшиндээ хүрэв

Хятадын түүхий эдийн эрэлт үргэлжлэн суларч буйгаас гангийн үйлдвэрлэлийн голлох түүхий эд болсон төмрийн хүдрийн үнэ мягмар гарагт сүүлийн долоон жилийн хамгийн доод түвшинд хүрч унав.

Хятадын боомтууд дээр төмрийн хүдрийн үнэ тонн нь 43.4 ам.доллар байгаа тухай Steel индекс мэдээллээ. Хамгийн сүүлд 2008 онд л төмрийн хүдрийн үнэ ингэж шалдаа бууж байв. Тэр үед үнийг аврах гэрээний тусламжтай бэлэн бүтээгдэхүүний зах зээлд төмрийн хүдрийн үнийг сэргээж байсан юм.

Хятадад гангийн үнэ сүүлийн өдрүүдэд хамгийн доод түвшинд хүрсэн нь дэлхийн зах зээл дэх төмрийн хүдрийн ханшийн уналтад нөлөөлжээ. Олон улсын хөрөнгө оруулалт, санхүүгийн Macquarie группийн шинжээчид Хятадын гангийн эрэлт энэ онд 5.7 хувиар унасан бөгөөд 2016 онд мөн үргэлжлэн унана гэж тооцоолов. Дэлхийн гангийн үйлдвэрлэл хүчин чадлаа 170 сая тонноор буюу Баруун Европын гангийн үйлдвэрлэлтэй тэнцэх хэмжээгээр багасгах шаардлагатай байгааг Macquarie тооцоолсон байна.

Төмрийн хүдрийн үнэ унаж буй бас нэг шалтгаан нь BHP Billiton, Rio Tinto болон Vale зэрэг уул уурхайн аваргууд ханш суларсныг мэдсээр байж нийлүүлэлтийн хэмжээгээ багасгаагүй явдал. Хятадын боомт хотууд болон төмөрлөгийн үйлдвэрийн нөөц нэмэгдсээр байгаа. Өнгөрсөн долоо хоногийн байдлаар Хятадын төмөрлөгийн голлох үйлдвэрүүдэд гангийн нөөц дөрвөн хувиар нэмэгдсэн гэдгийг Хятадын MySteel портал цахим хуудас мэдээлсэн. “Одоохондоо бид гангийн нийлүүлэлтийг таваарын голлох зах зээлүүдэд багасгах хэрэгтэй байна” хэмээн Macquarie-ийн шинжээч Колин Хамилтон хэллээ.

Нөөц нэмэгдэж буй нь Бразил дахь S11D болон Австралийн Roy Hill-ийн төмрийн хүдрийн хоёр томоохон төсөл ирэх жил эхлэхээр болсонтой холбоотой. Ойрын хугацаанд Хятадад үүссэн гангийн нөөцийн илүүдлээс харахад энэ металлын сул эрэлт нэлээд удаан үргэлжлэх төлөвтэй. “Ган болон төмрийн хүдрийн үйлдвэрлэлийн зээлийн шалгуур өндөрсөж, нийлүүлэлтийн хомстол үүсэж магадгүй гэсэн бага зэргийн айдас нөхцөл байдлыг нэлээд хүндрүүлж байна. Бид нөөц нэмэгдэж байгаа явдалд нэлээд хашир хандаж байгаа” хэмээн Швейцарийн UBS банкны шинжээч хэлэв.

Хятадын үйлдвэрүүд алдагдалтай ажилласнаар төмөрлөгийн үйлдвэрүүдийн хүчин чадал буурч эхэлбэл үнэ цаашид ч унана. Энэ сард Хятадын ган үйлдвэрлэгч Tangshan Songting Iron & Steel өрийн дарамтнаас болж үйлдвэрлэлээ бууруулахаа мэдэгдсэн. Тус компани нь Хятаддаа таван тонны үйлдвэрлэлийн хүчин чадалтай хоёр дахь том хүч юм. Гангийн үйлдвэрлэл буурах явц аажмаар, өргөн цар хүрээтэй үргэлжилж болзошгүйг шинжээчид сэрэмжлүүлж байна. Худалдааны маргаан үүсгээд байгаа Хятадын гангийн экспорт зах зээл, худалдаанаас үүссэн Хятадын эсрэг маргаан нэмэгдсэн ч ойрын хугацаанд нэг хэсэгтээ үргэлжилнэ. “Харин богино хугацаанд бэлэн мөнгөний урсгал, өрийн дарамт нь гангийн үйлдвэрлэл алдагдалтай ажиллахад голлох нөлөөг үзүүлнэ” хэмээн Сингапурын Таваарын солилцооны дэд тэргүүн Адриан Лант хэлж байна.

Бусад таваарын хувьд голлох металлууд мягмар гарагт өссөн Оросын байлдааны онгоцыг Турк буудаж унагаснаас газрын тосны ханш огцом нэмэгдэв. Зэсийн үнэ гурван хувиар чангарсан бол никелийн ханш долоон хувиар огцом өсчээ.

Хенри Сандерсон

Засгийн газрын мэдээ