2016 оны 03 сарын 28-ны өдөр ӨМӨЗО-ны Шилийн гол аймгийн зүүн үзэмчин хошууны Улиастай балгасын Баян овоо гацааны хилийн 4-р заставаас гал алдсан байна. Галыг шуурхай унтрааж чадаагүйн улмаас ой хээрийн түймэр болж, хоёр хоногийн турш ажилласаар өчигдөр шөнө галыг бүрэн унтраасан байна. Ой хээрийн энэхүү түймрийн улмаас цөөнгүй малчин орох оронгүй болохын зэрэгцээ түлэгдэж, мал хоргодсон.

Харин энэ талаар Хятадын ССTV-13 телевиз өчигдөр ташаа мэдээлэл гаргажээ. Тодруулбал уг гал нь Монголоос хил давж орж ирсэн. Үүний улмаас гарсан хохирлыг Монгол улс хариуцах болно гэсэн мэдээллийг хүргэв. Харин Шилийн гол аймгийн зүүн үзэмчин хошууны Улиастай балгасын Баян овоо дахь малчин түмэн түймэр хил давж орж ирээгүй харин хилийн 4-р заставаас гал алдсан гэдгийг хэлдэг бөгөөд үүнийгээ баримтжуулсан байна.

Үнэхээр хятадын ССTV-13 телевизээр мэдээлсэн шиг Монголын хилээр дамжин гал гарсан талаар Онцгой байдлын ерөнхий газраас тодруулахад: Улсын хэмжээнд 2016 оны 03 дугаар сарын 31-ний өдрийн байдлаар Булган аймаг Бугат сум, Дорнод аймаг Баянтүмэн, Баян-Уул, Матад сум, Сүхбаатар аймаг Эрдэнэцагаан, Сүхбаатар, Наран, Дарьганга сум, Хэнтий аймгийн Биндэр суманд нийт 4 аймгийн 9 суманд 10 удаа, Нийслэлийн Хан-Уул дүүргийн 11-р хороо Богины аманд 1 түймэр нийт 11 удаагийн ой, хээрийн гал түймэр гарч /урьдчилсан байдлаар/ 2 га ой, 39.350 га хээр, нийт 39,352 га талбай түймэрт өртсөн байна. Хилийн орчим ой хээрийн түймэр гараагүй гэдгийг хэлэв.

Хятадын ССTV-13 телевиз юуны учир ийнхүү ташаа мэдээлэв гэдэг нь одоогоор тодорхойгүй байна. Ташаа мэдээллээ залруулах бизээ.