“Эрдэнэс Тавантолгой”-н 1072 хувьцаа гээд л ард түмэндээ төрийн их хайр хишгийг хүртээж байна хэмээн шоудаж хэсэгтээ л тараасан. Гэвч өнөө хэр түүний үр өгөөжийг амссан хүн ховор. Ёстой л бухын доод дахийг харж үнэг турж үхэхийн үлгэрээр хүлээсээр, итгэсээр...

Ер нь бол тэтгэвэрийн хэдэн хөгшид, халамжийн хэдэн хүмүүс болоод оюутнуудын сургалтын төлбөрийг төлсөн болоод л ШОУ дууссан гэж болно.

Харин өнөөдөр эдийн засгийн хямралаараа элгээрээ хэвтсэн ард түмнээс цөөхөн хэдэн төгрөгөөр Хятад, Тайвань, Солонгос иргэд энэхүү 1072 хувьцаанаас ашиг олохоор шийдлээ. Ямартаа ч бидний ярьж заншсан “Урт цагаан”-аар эргэлдэж хэдэн төгрөг болгох гэсэн иргэдийн сонирхолд тулгуурлан 600000-1000000 төгрөгний хооронд худалдан авсаар байгааг эх сурвалжууд мэдээлсээр... Гэтэл энэхүү хувьцаа нь иргэдэд ашгаа өгч эхэлбэл өнөөгийн мөнгөн дүнгээр 22 сая төгрөгний үнэ бүхий эд гэдгийг эдийн засагчид өгүүлж байгаа.

Гэхдээ Эрдэнэс Тавантолгойн “1072 хувьцаа”-г ашиглах болоогүй хоёр дахь зах зээлийг нээгээгүй байгаа гэдгийг албаныхан мэдээлж байгаа ч, гадуур иргэдийн дунд 1072 хувьцааг нь худалдан авч бэлэн мөнгө тарааж байна гэсэн яриа газар авсаар л байна. Ийнхүү хоёр үзүүртэй зүү шиг нэг шийдэлд хүрэхгүй байгаа 1072 хувьцааг хэзээ төр засгийнхан анхаарч иргэдийн хүлээлтийг өндөрлүүлэх юм бол.

Харин төр засаг энэ асуудалд ямар нэгэн хяналт анхаарлаа хандуулахгүй өөр хоорондоо улстөр ярьж, сонгуулийн хэдэн хоногт оноо цуглуулах ажлаа хийхээс цааш хэтрэхгүй бололтой.

Эх сурвалж: www.bolod.mn