Улаанбаатар хотын цагдаагийн газарт ирж байгаа дуудлага мэдээллийн 30 орчим хувийг гэр бүлийн хүчирхийлэлтэй холбоотой хэрэг эзэлж байна. Гэр бүлийн хүчирхийлэлтэй холбоотой дуудлага мэдээллийн хүрээнд 40.8 хувийг архидан согтуурсны улмаас гэр бүлийн хүчирхийлэл үйлдсэн гэх тоо баримт бий. Гэр бүлийн хүчирхийлэлд эмэгтэйчүүд, тодруулбал албан ёсны эхнэр 62.6 хувь, хамтран амьдрагч эмэгтэй 18 хувийг эзэлж байгаа. Харин бусад хувийг эцэг эх, төрөл төрөгсөд гээд хуваагддаг байна. Харамсалтай нь гэр бүлийн хүчирхийллийг гэмт хэрэг гэж үздэггүй байсан юм. Энэ нь эрх зүйн зохицуулалттай шууд холбоотой байсан. Өөрөөр хэлбэл Гэр бүлийн хүчирхийлэлтэй тэмцэх тухай хууль шинэчлэгдэхгүй 12 жилийн нүүр үзсэн. Олон хүний амь амьдралаар “туг тахиж” байж төрийн болон төрийн бус байгууллагууд хамтран Гэр бүлийн хуулинд өөрчлөлт оруулах хуулийн төсөлд саналаа хэлснээр УИХ-аас баталсан. Ингэхдээ гэр бүлийн хүчирхийлэл нь гэмт хэрэг хэмээн үзэж Эрүүгийн хууль, Зөрчлийн тухай хууль, Эрүүгийн хэрэг хянан шийдвэрлэх тухай хууль, Хууль сахиулах ажиллагааны тухай хууль, Шүүхийн шийдвэр гүйцэтгэх тухай хуулиудтай нягт уялдаатайгаар хуульчлагдсан байна. Гэр бүлийн хүчирхийлэлтэй тэмцэх хууль энэ оны 9 дүгээр сарын нэгнээс хууль хэрэгжиж эхлэх юм.

Тэгвэл энэ хууль хэрэгжих хүртэл иргэд хэрхэн хохирсон талаар Хүчирхийллийн эсрэг үндэсний төвийн захирал Д.Энхжаргал “Гэр бүлийн хүчирхийллийн улмаас сүүлийн зургаан жилд 90 хүн ойр дотны хүмүүсийнхээ гарт амь насаа алдаж, өнгөрсөн онд л гэхэд 24 хүн, он гараад эхний дөрвөн сард 5 хүн амь насаа алдсан гэсэн мэдээллийг өгсөн. Тэрбээр, 2004 онд Гэр бүлийн хүчирхийлэлтэй тэмцэх тухай хуулийг баталсан ч холбогдох бусад хуулиудад гэр бүлийн хүчирхийллийн асуудлаар тусгаагүйгээс хохирогч хохирсон дээрээ нэмж хохироод үлддэг байсан. Хүчирхийллийн эсрэг үндэсний төв байгуулагдсан цагаасаа хойш давхардаагүй тоогоор 19600 хүнд үйлчилсэн” гэв.

Гэр бүлийн хүчирхийлэлтэй тэмцэх хууль хэрэгжиж эхэлснээр хүчирхийлэл үйлдсэн хүн хохирогчид дөхөж очихыг тодорхой хугацаагаар хориглох, тодорхой газар очихыг хориглох, зан үйлд нөлөөлөх албадан сургалтад хамруулах зэрэг хорихоос өөр төрлийн ял, албадлагын арга хэмжээг хүлээлгэхээр болсон байгаа. Мөн гэр бүлийн хүчирхийлэл үйлдэх үедээ хүний амийг санаатай хөнөөсөн, биед нь гэмтэл учруулсан бол хорих ял оноохоос гадна оногдуулах ялыг хүндрүүлэхээр хуульчилсан байна.

Харин гэр бүлийн хүчирхийллийн хажуугаар чимээгүй өнгөрсөн, хүчирхийллийн талаар мэдээлэх үүргээ биелүүлээгүй этгээд Зөрчлийн тухай хуулиар хариуцлага хүлээхээр болжээ. Өөрөөр хэлбэл хажуу айлд “зодоон” болж байгааг цагдаад мэдээлээгүй бол та хариуцлага хүлээхээр болж байна.

Харин цагдаагийн алба хаагч хүний амь нас, эрүүл мэндтэй холбоотой мэдээллийг хүлээн авсан даруй таслан зогсоох, гэр бүлийн хүчирхийллийн дуудлагаар айлд нэвтрэх, хохирогчийг хамгаалах, аюулын зэргийн үнэлгээ хийх, хүчирхийлэл үйлдэгчийг баривчлах, галт зэвсэг, зэвсгийн чанартай зүйлийг хурааж авах, хохирогчид гэрээсээ хувцас, эм, хүүхдийн хичээлийн хэрэгслээ авахад нь туслах, баримт бичгийг нь хүчирхийлэл үйлдэгчээс шаардан гаргуулах зэрэг үүрэг хүлээх юм.

Хуулиар хүчирхийлэлд өртсөн хүүхдэд үзүүлэх тусламжийг нарийвчлан заасан байгаа. Тухайлбал, хүүхдийн насанд хүрэгчдээс хамааралтай, нас, сэтгэхүйн хувьд бүрэн төлөвшөөгүй, эмзэг байдаг онцлогийг харгалзан, хүүхдийг хүчирхийллээс хамгаалах үйлчилгээ, дэмжлэг, туслалцаа, хамгаалалтыг тусгайлан зааж өгчээ.