“Wall Street Journal” сэтгүүлээс Монголын өрийн түвшин 2010-2015 он хүртэлх таван жилийн хугацаанд 264 хувиар нэмэгдэж, дэлхий дахинд дурдсан хугацаан дахь хамгийн том өсөлт болсон гэж тэмдэглэжээ.

Үнэхээр ч өр гэгч асуудал сүүлийн үед Засгийн газрын төдийгүй жирийн иргэн Дорж, Дулмаагийн сэтгэл түгшээх асуудал боллоо.

Монголчууд хэзээнээсээ “Өртэй хүн өөдөлдөггүй, өттэй мал таргалдаггүй" хэмээн ярьдаг. Гэвч энэ үг өдгөө үнэ цэнээ алдаж, өнөөдөр төрсөн нялхсаас өвгөд хөгшид гээд цөм л өрөндөө баригдаж эхэлжээ.

Гудамжаар яваа хэнээс ч та хэн нэгэнд өртэй юу гэж асуухад өр шир тавиагүй гэх хүн бараг олдохгүй л болов уу, Юмыг яаж мэдэх вэ, “Ямар ч өргүй ээ" гээд толгой гэдгэр, сэтгэл өөдрөг яваа хуруу дарам цөөн хүнтэй ч таарч мэднэ. Тэгвэл тэд ч бас өртэй. Гайхаж байна уу.

Өчигдрийн байдлаар үндэсний нийт өрийн хэмжээ 14 тэрбум 824 сая 369 мянган ам.долларт хүрчээ. Үүнийг “Countrymeters.info” сайтаас харж болно.

Үндэсний нийт өрийн хэмжээг 3.1 сая хүн амынхаа тоонд хуваах юм бол нэг хүнд 4,905 ам.доллар ногдож байна. Өчигдрийн байдлаар ам.долларын ханш 2,238 төгрөгтэй тэнцэж байсан гэж үзвэл хүн бүр 10 сая 997 мянган төгрөгийн өртэй явна.

Тэгэхээр өргүй гээд баяртай алхаж яваа хуруу дарам цөөн хүн ч ийм л хэмжээний өр ширэн дунд аж төрж байна гэсэн үг юм. Энэ нь өнөөдөр дөнгөж мэндэлсэн нярайгаас өтгөс өвгөд гээд бүгд хамааралтай өр. Уг нь монголчууд бид “Өргүй бол баян, өвчингүй бол жаргал” гэдэг сэн.