УИХ, НИТХ-ын 2016 оны сонгуульд МАН үнэмлэхүй ялалт байгуулж, албан тушаалын томилгоо хийгдэх үед иргэдийн хамгийн үл таалсан хүмүүсийн нэг нь Нийслэлийн засаг дарга бөгөөд Улаанбаатар хотын захирагчаар томилогдсон Сундуйн Батболд байсан билээ.
 
Тэр бүү хэл зөвхөн түүнд зориулсан хошин фельетон хүртэл зохиогдож байв.
 
Үүнээс хойш өрөөгөө тансаг хэлбэрээр тохижуулсан, гудамжны нохойд спираль тавих асуудлыг судлуулсан гэх мэтээр байнгын хэл ам тасрахгүй явсан ч тэр бүрийд нь л элдэв тайлбар өгч, нэрээ цэвэрлэхийг хичээж байв. Харамсалтай нь нийслэл хотод орсон их хэмжээний цас түүнийг менежерийн ур чадвар тааруу нэгэн болохыг Улаанбаатарчуудад тун тодорхой харуулсан билээ.
 
Нийслэлийн авто зам дахь цасыг цэвэрлэх ажлыг тун муу зохион байгуулсан төдийгүй түүнээс болж Улаанбаатары маш олон иргэн эд материал болоод эрүүл мэндээрээ хохирсон юм. Гэтэл бараг сарын өмнөөс л зарлагдаж байсан цаг агаарын хүнд нөхцөл байдалд тааруулж бэлтгэл огт хийгээгүй хотын удирдлага  цас орсон сүүлийн өдрүүдэд л замын цас хайлуулах бодис худалдан авах төсөв, санхүүг баталж байх жишээтэй.
 
Мөн сүүлийн үед шуугиан тарьж, яваандаа Монгол, Орос хоёр улсын харилцааны асуудал ч болж магадгүй болоод байгаа "Хар Сарнай" хамтлагийн дуучин С.Амармандахыг зодсон хэрэг ч түүнтэй шууд бус сэжмээр холбогдсон юм. Тодруулбал Нийслэл хотод өвөлжилтийн байдал хүндэрч, эдийн засгийн хямралаас үүдэлтэйгээр иргэдийн амьжиргаа хүнд байгаа энэ үед "Аз жаргалтай хот" нэртэй үдшийн цэнгүүнд Нийслэл хотын удирдлагууд болох Су.Батболд, Ц.Сандуй нар оролцож баярласан. Энэ нь маш олон Улаанбаатарчуудын зэвүүцлийг төрүүлж буй үйлдэл болж байгаа.
 
Ийнхүү нэг жил ч хүрэхгүй хугацааны дотор алба хашихдаа байнга шахам л асуудал тарьж яваа Сундуйн Батболд МАН-ын нэр хүндийг иргэдийн дунд  хамгийн их унагаж буй албан тушаалтан болоод байна. МАН-ын жирийн гишүүд ч түүнийг үнэхээр Улаанбаатар хотыг удирдаж чадах хүн мөн эсэхэд эргэлзэж эхэлснээ ил тод ярих болжээ.
 
Э.Мягмар
sonin.mn