УИХ-ын чуулганы хуралдаанд суух гишүүдийн тоо сүүлийн хоёр долоо хоног дарааллан илт буурлаа. Нэн ялангуяа УИХ-д үнэмлэхүй олонхи буюу 65 суудалтай болсон МАН-ынхан асуудал шийдэх нь бүү хэл чуулганы хуралдааны ирцээ ч бүрдүүлж чадахгүй болоод байна.

 

Өнгөрсөн долоо хоногт гэхэд л МАХН-ын О.Баасанхүү, МАН-аас сонгогдсон гишүүд нийлсэн нийт хорин гишүүн л чуулганы нэгдсэн хуралдаанд оролцсон юм. Өнөөдөр мөн л УИХ-ын чуулганы хуралдаан 10 цагт товлогдсон ч  гишүүдийн ирц бүрдэлгүй удав. УИХ-ын дарга М.Энхболд ОХУ-д ажлын айчлал хийж байгаа учраас өнөөдрийн  чуулганы хуралдааныг  даргалж байсан УИХ-ын дэд дарга Ц.Нямдорж үүнд бухимдаж: "МАН-аас УИХ-д сонгогдсон 65 гишүүн чуулганы хуралдаандаа ирж хурлын ирц бүрдүүл. 2012 оны Ардчилсан намын ирц шиг яваад байх юм уу. Сонгогчдын итгэлийг дааж амьдар. Ажлын хэсгийнхэн үүдэнд ирээд бүтэн өдөр хүлээж байна. Хариуцлагатай байх хэрэгтэй шүү, МАН-ынхан. Чуулган дундуур байнгын хороо хуралдуулж, чуулган үймүүлдэг байдлаа зогсоо.

 

Чуулганы хуралдаанаа цагтаа эхлүүлдэг хэлбэрт шилжмээр байна. Гишүүдийн туслахууд “унтаж байгаа” гишүүдээ гэрээс нь очиж авчирч хуралдаанд нь суулга. Томилолтоор яваагүй, хуралдаанд суух ёстой 60 гишүүн байна. Чуулганд суухгүй юм бол яах гэж сонгогдсон юм бэ. Хуралдаа яаралтай ир" хэмээсэн юм.

Ийнхүү Монгол улсыг хямралаас аврах уриатай УИХ-ын сонгуульд ялалт байгуулсан МАН-ынхан хуралдах ирцээ арай ядан бүрдүүлж  байна.