Монгол улсын хүн ам нэмэгдэж, тэдний тэн хагас нь нийслэл Улаанбаатар хотод амьдардаг болохоор нийслэлийн төрөхүүдийн ачаалал  их, ор хүрэлцэхгүй гэх асуудал үргэлж л хэл ам дагуулж,  улсаас төсөвлөдөг   мөнгө нь хаанаа ч хүрэлцдэггүй гэж  эмнэлгийн дарга нар байнга улигласаар.

Гэтэл төрөх гэж байгаа эхчүүдийн  халаасыг хоосолж түүгээрээ түрийвчээ түнтийлгэж байдаг эрхэм байх юм. Тэр хүн бол хуучнаар Нэгдүгээр амаржих газар одоогийн Өргөө амаржих газрын дарга Д. Энхбаяр.

Тэрээр арван жилийн ангийн найз Батдавааг Аж ахуй эрхэлсэн захирлаар   тавьж, хууль хяналтын байгууллагад өндөр албан тушаал хашиж байгаад тэтгэвэрт гарсан Бумнанжид хурандааг Хуулийн зөвлөхөөр ажиллуулж,  төрийн байгууллагын төсвийн мөнгийг хэрхэн танаж хэрэглэх, хууль бусаар олсон орлогыг  хэрхэн  далдлан ашиглахдаа л  зөвлөгөө авч, хамтран  ажиллаж байна.

Төрөх дөхсөн, хүндэрсэн эхчүүдийг харъяаллын бус гээд хээв нэг буцаах мөртлөө тус төрөхөд төрөхийг хүссэн эхчүүдээс 300000 төгрөгийг авч төрүүлдэг бизнес энэ төрөхөд цэцэглээд удаж байна. Үүнийг үүсгэн санаачлагч нь Б.Бадрах эмч хэмээх бүдүүлэг нэгэн, Нийслэлийн Засаг даргын орлогч асан Б.Батаагийн дүү. Ахынхаа нэрээр энэ мэт хууль бус мөнгөний ажлыг эхлүүлж, тус төрөхөд хувийн юм шиг  аашилж, эмч нарыг дарамталж,  Д.Энхбаяр даргыг ч өөрийнхөө эрхшээлд оруулсан.  Д.Энхбаяр эх барих эмэгтэйчүүдийн мэргэжлийн эмч бус учир мэдлэг, ур чадвар сайтай эх барихын зөвлөх зэргийн эмч Б болон М нарыг Эмчилгээ эрхэлсэн орлогчоор ажиллуулсан боловч  тэдний үнэнч шударга байдал таалагдахгүй ажлаас нь халж, оронд нь мөнгө авахад зуучлагч өөрийнхөө дотны хүмүүсийг орлогч дарга, стационарын эрхлэгчээр тавьж ажиллуулсан.

Монгол улсад эх, хүүхдийн тусламж үнэ төлбөргүй гэсэн боловч энэ төрөхөд төрөхийн тулд  300000 төгрөг төлдөг бөгөөд энэ нь ямарч баримт байхгүй зөвхөн Д.Энхбаяр даргын халаас руу ордог гэх харлага төрөөд удаж байна.  Тус төрөхөд амаржихыг хүссэн жирэмсэн эхчүүдийг мөнгөө өгч чадвал төр, чадахгүй бол яв гэж хөөнө, аргаа баран мөнгөө өгсөн хүнд энэ тухай хэн нэгэнд мэдэгдэхгүй гэж ам тангарагийг нь  авна.  Энэ мөнгөнөөс эмнэлэгт нэг ч улаан мөнгө зарцуулахгүй, төрүүлсэн эмч, эх баригч нарт сохор зоос ч олдохгүй.

Өдөрт дунджаар 4 эх төлбөр төлж төрөхөд  1200000 жилдээ 480 000 000, 5 жилээр бодоход 2 тэрбум төгрөг өлхөн халаасалсан Д.Энхбаяр  Нүхтэд шинэ байр авч, хүүхдээ өндөр төлбөртэй сургуульд сургаж, өмсдөг хувцас нь брэнд болж, байн байн эхнэрийн хамт гадаадад аялна.  Ажил дээрээ байхаасаа байхгүй нь их.

Бас болоогүй ээ хаа газрын төрөхүүд эмчээр дутагдалтай байдаг бол эдний эмнэлэг  эмчээр хангалттай байдаг нь нэг талаасаа сайн боловч цаана нь бас л  эмч ажилд авахад мөнгө авдаг бичигдээгүй дүрэм үйлчилдэгтэй холбоотой.

Хэвтэн эмчлүүлэгчдийн хоолны зардал төсвийн тодорхой хэсгийг эзэлдэг боловч төрсөн эхчүүдэд цай, хоолыг өгдөггүй, ихэнх эхчүүдэд ар гэрээс нь цай шөл ирдэг болохоор тэр талаар гомдол гарах нь ч гайгүй, гэвч тэдний дунд эргэлтгүй, ядарсан хэсэг нь бусдын эргэлтээр голоо зогоож, хоногийг өнгөрөөнө. Энэ мөнгө хаашаа орно вэ.

Дарга зүгээр байж байгаад 300000 авч байгаа юм чинь нойр хоолгүй ажиллаж, төрүүлсэн хүнээсээ мөнгө авахад яадаг юм бэ гэсэн бодол эмч, ажилтнуудад төрнө.

Тиймээс зарим нэг эмч нар нь ч манай эхнэр өвдөөд удлаа төрүүлээд өгөөч гэж гуйхад дансны дугаараа өгдөг эрээ цээргүй байдал ч үүсээд байна.

Жил бүр төрөх юм биш, эсэн мэнд л төрж байвал хэдэн төгрөг ч яахав, хэл ам болоод яахав нялх үрд минь гай болно гэдэг Монголчуудын сэтгэл төрөхийнхнийг өөгшүүлсээр, давраасаар байх уу ……

Авилгатай тэмцэх газар Эмнэлгүүдэд айхтар сүртэй шалгалт хийсэн. Түүнээс нийслэлийн төрөхүүд ч мултраагүй. Гэхдээ тэрхүү шалгалтаар үр хөндөлтийн төлбөрт үйлчилгээний тодорхой  хувийг үйлчилгээ үзүүлэгчдэд олгосныг илрүүлээд, үр хөндөлтийг зогсоож, үйлчлүүлэгчдийг чирэгдүүлсэн.

Харин Өргөө амаржих газрын хууль бус 300000 төгрөг авдгийг илрүүлж чадаагүй юу, эсвэл  илрүүлэхийг хүсээгүй юу гэдэг нь сонин л юм.

Ард түмний ярьдагчлан 10000 төгрөг хулгайлбал шоронд орно, тэрбумыг хулгайлбал Засгийн газарт очно гэдэг үнэн юмдаа.

Олон жилийн түүхтэй ууган төрөх гээд эхчүүд мөнгөө барьж гүйдэг боловч,  Өргөө амаржихынхан мөнгө авдагтайгаа адил ажилдаа сайн уу гэвэл бас тийм биш. Мэргэжлийн бус даргатай, Хүлээн авахаасаа эхлээд төрөхөөр ирж байгаа ээж нарыг зандчиж харьцана, аашилж загнана, жил бүр л эмч нарын хариуцлагагүйгээс болж эх эндлээ, төрөхөд 2-3 хоносон эх гэнэт нас барлаа гэх мэт сонин хэвлэлээр шуугих боловч, эцэст нь хөөрхий эхийн хохь болоод л өнгөрдөг.

Тус амаржих газарт 2013 онд 5, 2014 онд 4, 2015 онд 2, 2016 онд 3 эх эндсэн байна.

Нийслэлийн Өргөө амаржих газарт эх эндсээр, Д.Энхбаяр дарга авилга авсаар байх уу.

Бурууд нүд хурц

Авилгатай тэмцэх газар, Эрүүл мэндийн яам, Нийслэлийн Эрүүл мэндийн газар энэ асуудлыг хэрхэн шийдэхийг ард түмэн харж байна.

АТГ.мн