Хийл хөгжмийг дэндүү гэмээр төгс эзэмшиж, амь амьдралынхаа нэг хэсэг болгож яваа сонгодог хатагтай Ч.Дэлгэрцэцэг.

Тэрбээр хөгжим бүжгийн коллежоос авахуулаад АНУ-ын Мичиган мужийн “Grand Valley” их сургуулийг хийлийн гоцлон тоглоочоор төгссөн Монголоор зогсохгүй олон улсад хүлээн зөвшөөрөгдсөн хийлч билээ. Жилд нэг нижгэр тоглолт хийж, хаяаахан ямар нэг арга хэмжээнд урилгаар тоглодог. Өчигдөр “Монгол бахархлын өдөр”-өөр Улаанбаатар чуулгын гоцлол хөгжимчин болсон. Тэгвэл хийлч бүсгүй тун удахгүй болох бие даасан зургаа дахь уран бүтээлийн тоглолтоо хийхээр талаар мэдээлэл хийлээ.

Тус тоглолтоо нийслэлийн нүүр царай, соёлыг харуулсны дээр уянгын бус транс хөгжим оруулсан, үзэгчдийг уйдаахгүй шинэлэг тоглолт болно гэдгийг онцолж байв. 

Хийлч Ч.Дэлгэрцэцэг “Сүүлийн үед Монголд цахилгаан хийл хөгжим дэлгэрч байгаа. Цахилгаан хийлээр ямар ч хөгжмийг тоглож болдог. Би цахилгаан хийл хөгжмөөр тоглоно. Тоглолтын эхэнд “Улаанбаатарын үдэш” дууг транс хэлбэрээр дуулна. Учир нь Улаанбаатар хот маань намуухан, уянгалаг биш, машин холхилдсон дуу чимээтэй, энд тэнд гэрэл анивчсан хот болжээ. Энэ хурдацтай өөрчлөлт хотын соёлыг олон улсад ч бас таниулах хэрэгтэй юм” гэлээ.

Түүний тоглолт энэ сарын 30-нд болох бөгөөд Дээгий тоглолтынхоо дараагаар “Улаанбаатар чуулга”-ын уран бүтээлчидтэй хамт ОХУ-ын Эрхүү хотын драмын театрт тоглох аж.

Д.Ана